U·IATTIMGIPAONI
TURA: Robibar pringo, 45 Battalion BSF-ni sipairang, gong lak 2.64 ong·gipa mang 22 matchurangko Boreralgachar joloniko rim·na man·aha.
Koborko on·ani gitade, Robibar pringo 45 Bn BSF-ni sipairang, Brahmaputra chibimao ringo re·roroe nirok sandianirangko dakengmiting somoio, Boreralgachar aro Khagrachar-ni wilwilao niam gri matchu badinganina chanchichipenggipa manderangko chagrongaha indiba BSF-ni sipairangko nikata bakan matchu badingenggipa manderang, Brahmaputra chibimaona bilonange kate jokna man·aha.
Uni ja·man bakan BSF-ni sipairang, Boreralgachar joloniko am·sandiangenba, gong lak 2.64 ong·gipa mang 22 matchurangko man·eaha.
Iana skangba, Boreralgachar aro Khagrachar jolo niam gri matchu badingenggipa sakgni ba sakgittam manderang, BSF sipairangoni kate jokna man·aha ine BSF official-rang u·iataha.