Gitcham sipairangko Tura MP mittelpila
U·IATTIMGIPAONI
TURA: Mongolbar salo, Tura-ni MP Agatha K Sangma, a·dokni pilak ex-servicemen ba gitcham sipairangko uamangni kamrangna mittelpilangenba, gitcham sipairangko pangnan mande ra·china gita a·doko songdongenggipa manderangko didiangaha.
Mongolbar salo, Headquarters 101 Area, Indian Army aro Meghalaya a·dokni Rajya Sainik Board-ni gita Mega Ex-Servicemen Rally-ko Tura-o ong·atangaha aro ia Rally-ko ong·atanio Tura-ni MP-ba bakko ra·e, gitcham sipairangni kamrangna mittelpilangaha.
Sipai dolrangni a·songna dangdike on·enggipa kamrangna mittelpilangengon, bang·bata sipairangan dambemitingon kamoni neng·takrongani gimin sorkari, gitcham sipairangni janggi tanganio dakchakanirangko on·na gita CM Elevate, PRIME aro uandakgipa scheme-rangko ra·gate on·skaaha ine Sangma parakataha.
Meghalaya a·doko Sainik School-ko kulina gita a·dok sorkari, cholrangko nienga ineba ia tom·anio Tura-ni MP, jinmana parakataha.
Meghalaya a·doko gitcham sipairang, an·tangtangni pension-rangko man·anio neng·nikanirangko man·jana gita 58 Gorkha Training Centre aro Assam Regiment Centre-ni kamrangnaba ua dingtangmancha mittelpilaniko parakangaha.
Ia Rally-ko ong·atanio Meghalaya Rajya Sainik Board-ni Director, Colonel Gautam Rai-ba dongpae jinmana aganprakangengon, Garo Hills-o donggipa gitcham sipairangni aro uamangni neng·nikanirangko namatna man·na gita ia Rally-ko ong·ataha ine talataniko on·angaha.
Gitcham sipairang, kamtangtangoni neng·takangani ja·man an·tangtangni man·na nanganirangko man·china aro janggi tanganio maming neng·nikanirangko chagrongna nangjana gita ua an·tangni bil ama gita kamrangko ka·gen ineba Col Rai, ku·rachakaniko on·angaha.
Ia Rally-ko ong·atanio, gitcham sipairang aro dingtang dingtang army official-rangba dongpae bak ra·angtokaha.
Ia apsan dakgipa Mega Ex-Servicemen Rally-ko re·anggipa November-ni 24 tariko, Shillong songjinmani Happy Valley-o donggipa 58 Gorkha Training Centre-oba ong·atangahachim aro ia Rally-ko ong·atanichi Shillong songjinmani gitcham sipairang dingtang dingtang namgnirangko man·aha.