U·IATTIMGIPAONI
SHILLONG: Butbaro Shillong-ni Traffic Police, rim·a man·gipa ge-180-na bate silencer-rangko road roller-chi nosto ka·e gale, jemangan garirango silecer-ko tekna namnikachim, uamangna dal·begipa mikkrataniko on·aha.
Shillong traffic police ia bilsini August dipet ge-181 modified ka·gipa silencer-rangko district-ni senior official-rangni mikkango Police Reserve-o nosto ka·e galaha.
Media-ni manderang baksa golpoanio, East Khasi Hills-ni SP Sylvester Nongtnger agana, uamang ge-320 mofied ka·gimin silecer-rangko rim·aha, aro uamangni nokgiparangko okke galchina didiaha.
Indiba bang·a manderangan silencer-ko tekka gampetpetataha, uni gimin rim·a man·giparangko nosto ka·e galaha.
“STP mikkangchiba indake modified ka·e silencer-ko tekggiparangko nosto ka·angkugen, jean niamgri jakalani ong·a. Silencer-rangko chaka sam 2 aro sam 4 jakalgiparang tekttokaha, indiba uamangoni chaka sam 2 jakgiparang bang·bataha,” ine Nongtnger aganaha.
“Chinga indakgipa kamko ka·anichi company-ni dakgimin dingtangatjachina rakbegipa mikkrataniko on·aha. Tinted glass-ko tekgiparangni giminba chinga kam ka·anggen, indiba da·o gampetpetatgipa silencer-rangko tekkgiparangko nosto ka·anichi a·bachengaha. Da·alo chinga silencer-rangko nosto ka·e galaha, indiba da·o chinga ia kamko ka·anichi jinma manderangna dal·begipa mikkrakataniko dakaha,” ine Nongtnger aganaha.
SP Vivek Syiem agandapa, indake silencers piped-ko tekkanichi bang·a manderangan neng·nikaniko man·tokaha, maina iako tekkanichi nachilna namen knadikani ong·aha, aro iabaksana bi·sarangni poraimiting somoio aro bilsi brigipa manderangna namen neng·takanirangko on·aha.
“Chinga ia kamko chu·sokatna man·ani gimin jinma manderangko mittela, maina uamang chingna 111 nomborro call ka·ate ba message-ko watate indakgipa silencer-ko tekka gampetpetani gimin aganaha, uamangni gimin chinga rim·na man·e da·o nosto ka·e galaha,” ine Syiem aganaha.
City-o gari ta·rake salgiparangni gimin sing·anio, senior police agana, uamang ta·rake gari salgiparangkoba sandienga, aro iani giminan chinga dingtang dingtang biaprango checkpoint-ko donaha, mongsongbate walni somoio chu ringe gariko ta·rake salgipa chadamberangko rim·na tarisoani ong·a.
Ua agana, chadambe manderang chu ringe gariko ta·rake salaha, aro uamangni mitamrangde licence-griba salaha, uamangko rim·naba rakbeen kam ka·enga.
Chinga una agreba one way-o rang·gitik sandianiko dakaha, jemangan no entry ong·ahachim. Mitam manderang indake niam dongiminrangko pe·aha, uni gimin a·sel ong·e ra·aha aro janggiba gimana nangaha,” ine Syiem aganaha.