U·IATTIMGIPAONI
SHILLONG: Khasi Hills Autonomous District Council (KHADC)-ni winter session-ko Budbar salo a·bachengataha aro ia skanggipa salo, dingtang dingtang kamrangni gimin NPP-chi dilenggipa Executive Committee (EC) aro Opposition dolrangni ding·chaogrike jera ra·grikanirangko nikna man·angaha.
Ia winter session-o KHADC-ni EC, Khasi Hills Autonomous District (Khasi Social Custom of Lineage) (Amendment) Bill, 2023 aro United Khasi-Jaintia Hills District Fishery (Amendment) Bill, 2023-ko ra·baaha, jeon ia Bill-rangni bidingo EC aro Opposition membor-rangni ding·chaogrike jera ra·grikanirangko nikna man·angaha.
NPP-chi dilenggipa EC-ni kamrangna Opposition dolni dilgipa Titosstarwell Chyne, suk ong·gijaniko janapatengon, ia Bill-rangko council-ni session-ona ra·bana skang, batanggimin chang session-on KHADC-ni membor-rangna name poraichengna gita komibeoba salgni ba salgittam somoi on·china EC-ko mol·molahachim indiba da·alo ia winter session-ko a·bachengatani somoiosa amendment bill-rangni copy-rangko membor-rang man·soaha ine suk ong·gijaniko parakataha.
“Da·alsa chinga amendment bill-rangni copy-rangko man·aha aro amendment motion-ko 4 bajini gisepon on·china na·simang aganenga. Chinga ia bill-rangko poraie nichenggija maikai an·tangtangni chanchianirangko on·na man·gen,” ine Chyne sing·doangaha.
Chyne-ni matnanganirangna KHADC-ni Deputy CEN PN Syiem, aganchakaniko on·angskaengon, ia Bill-rangko winter session-ni somoion table ka·na nangahani giminsa ka·aha indiba Opposition membor-rang, ia amendment bill-rangko ra·bana nangnikjaengani giminsa iandakgipa kattarangko aganengakon ine matnangatskaaha.