SHILLONG: Tom·tomaniona re·bapilna gita sorkari baksa agangrikaniko a·bachengatahaon, Khasi Hills-o donggipa Mawmluh Cherra Cements Limited (MCCL)-ko chipna gita tik ka·ahani gimin Hynniewtrep National Liberation Council (HNLC) bobil dol, a·dok sorkarina mikrakataniko on·angaha aro iani bidingo Sohra-ni NPP MLA Gavin Mylliemngap-ko dosi chanenba, uko so·ote galna ka·mikkenataniko on·ataha.
MCCL-na a·dok sorkari, gong kror 350-na batpile koros ka·ani ja·manoba tangatpilna man·jahani gimin ia cement company-ko chipatsrangna tik ka·aha ine adita salrangna skangsan a·dokni Chief Minister Conrad K Sangma parakatahachim ine nikna man·a.
MCCL-ko chipna tik ka·engani gimin sorkariko jegalatskaengon, ia company-ko tange rakkianiara sorkaru aro Sohra-ni MLA Gavin Mylliemngap-ni daitoan ong·achim indiba MLA an·tangni constituency-na maming kamrangko ka·na man·jaha ine HNLC, uko kam watchina dabiangaha.
“MCCL-ko sorkari chipatna manchienga ong·ode Sohra-ni MLA Gavin, an·tangan dosko ra·e kamtangko watna nanggen. Ua kamtangko watna jechakgenchimode HNLC, ukon dosi changen aro jekai ua aro sorkari MCCL-ko manggittang gope gapaha apsan daken chingaba uni kosako ja·kuko de·skagen. Na·simang gita dake manderangko cha·bokgipa mandena siani sastiko on·na kraa,” ine HNLC-ni general secretary aro publicity secretary Sainkupar Nongtraw, Sukrobar salo seachi parakataha.
MCCL-ko chipna sorkarini tik ka·engani gimin jegalatengon, MCCL-ko chipkamna tik ka·aniara sorkarini politics kal·anisa ong·enga ine Nongtraw matnangataha.
“Sorkarini iandakgipa kamko chinga raken jegalenga maina ian Sohra-ni manderangko kamgri ong·atna miksonganisa ong·enga,” ine Nongtraw parakataha.
MCCL-ko namdapatna kam ka·ani pal ia cement company-ko chipkamsrangna miksongenganiara sorkarini ong·gija miksonganiko mesokanisa ong·enga ine janapatengon, a·doktangni cement company-ko ra·doani pal ia sokrari, gipin a·dokrangoni gipin jatrangchi chalaienggipa cement company-rangkosa namdapatna jotton ka·skaenga ine HNLC matnangataha.
 |
ReplyForward
|