SHILLONG: Ia bilsio ong·atna sienggipa Lok Sabha election-na kamrangko niroke ka·dilna gita a·dokni Bharatiya Janata Party (BJP) dol, dingtangmancha committee-ko songe donangaha.
Iani bidingo kobor ra·timgiparangna u·iataniko on·atengon, ia bilsio ong·atna sienggipa Lok Sabha election-na tarisamsoanirangko nipilna gita adita salrangna skangsan BJP-ni dilgiparang tom·aniko ong·atangaha ine BJP-ni dilgipa aro a·dokni Cabinet Minister AL Hek parakataha.
Election-na tarisamsoanirangko dingtang dingtang dilgiparangna dingtang dingtang kamrangko sualataha ineba Hek aganaha.
Hek-ni aganani gitade, Shillong aro Tura Parliamentary constituency-oni susana gita me·chik saksako man·chape candidate sakgni, BJP-ni tikitko bi·na gita re·baaha.
“Tikitrangko on·anio chinga cheani chol donggipa candidate-rangko nichenggen,” ine ua aganaha.
Ua an·tangde cabinet minister ong·e dakna nanggni kamrang bang·engani gimin ia chang Lok Sabha election-ode ua gipinrangko susaatskana nangnikenga ineba BJP Minister aganaha.
Indake ong·genchimoba, ma·mongni dilgiparang ge·etgenchimode ua Lok Sabha election-o susana kusi ong·aigen ine Hek parakatskaaha.
Lok Sabha election-o me·chik candidate-rang susana man·ode BJP-na nambatgenchim ine janapatengon, Shillong aro Tura parliamentary seat damgnion ua an·tangde me·chikrangkon susaatna nangnikbatengachim ine Hek parakataha.
“Election-o susana me·chikrangoni namgipa candidate-rang dongode Shillong aro Tura parliamentary seat damgnion me·chikrangko susaatna nanga,” ine ua aganaha.
Shillong aro Tura Lok Sabha seat damgninan da·o BJP-ni dilgiparang, candidate-rangko sandikuenga ine janapatengon, candidate-rangko bon·kame seokanide ma·mongo BJP-ko dilenggiparangni jakosa ong·aigen ine Hek parakataha.