SHILLONG: Meghalaya a·doko VVIP-rang re·rurana gita a·dok sorkari, helicopter-rangko para ra·na miksongengon, dingtang dingtang kamrangko nirokna aro dingtang dingtang nangchongmota kamrangna minister-rang re·rurana nangrongani gimin a·dok sorkarini kamna BJP-ni dilgipa aro a·dokni Cabinet Minister AL Hek-ba namnikpaaniko parakataha.
Minister-rang re·rurana gita helicopter-rangko para ra·na miksongenganina namnikpaaniko parakatengon, ua an·tangde rama gita songre songgabataniko namnikbata maina rama gita re·genchimode apsan somoion baditaba dam a·jarangko nappakjolna man·a ine Hek parakatskaaha.
“Helicopter-rango re·genchimode chinga badiaba mingsa program-onasan re·na man·aia,” ine ua aganaha.
Sing·anina aganchakaniko on·angkuengon, helicopter-rang bilonchakna gita a·arangko dal·e nanga ia katta ong·ja ine Hek talataniko on·angaha.
“Indiba a·dokni dingtang dingtang biaprango helicopter-rang bilonchakna gita sorkari, biaprangko taridapskana nanggen,” ine ua aganaha.
Meghalaya a·doko VVIP-rang re·rurana gita a·dok sorkari, engine ge·gni donggipa helicopter-ko para ra·e jakkalna miksongenga ine adita salrangna skangsan, a·dokni Chief Minister Conrad K Sangma parakatahachim.
Chief Minister-ni parakatani gitade, helicopter-ko jakkalanina sorkari konta hisap gamgen aro iana sorkari, dingtangmancha tender-ko on·enga.
“VVIP-rang nambate aro ta·rakbate re·rurana ian namgipa chol ong·gen aro tangka paisani gitaba agre koros ong·jawa,” ine Chief Minister aganaha.