SHILLONG: Meghalaya a·dokni Cabinet Minister aro Shillong parliamentary constituency-ni National People’s Party (NPP) candidate Ampareen Lyngdoh-ni Lok Sabha election-na campaign ka·aniko Tura-o ong·atenggipa Meghalaya Games matchotani ja·man a·bachengatnaba gnang.
Ia chang Meghalaya Games-ko January 15 tarikoni January 21 tarikona Tura-o sokachakengachim.
NPP-oni koborko on·ani gitade, Lok Sabha election-na campaign ka·aniko January 8 ba 9 tarikonin a·bachengna miksonganirang dongachim indiba NPP-ni bang·bata dilgiparangan da·o biaptango ong·kujani gimin Meghalaya Games matchotani ja·mansa a·bachengatskanaba dongaha.
Shillong parliamentary constituency-ni NPP candidate Ampareen Lyngdoh, Lok Sabha election-na campaign ka·aniko a·bachengatsrangkujaengoba batanggimin jarangonin, Shillong Lok Sabha constituency-ni ning·o donggipa dingtang dingtang songrangona wenangahachim.
“Lok Sabha election-na anga ka·sinsin kamrangko a·bachengataha aro South West Khasi Hills a·jani mitam songrangona re·ange manderangko grongeaha. Lok Sabha election-na skang re·baenggipa jarango anga man·a dipet songrangona re·ange manderangko grongena jotton ka·gen,” ine adita salrangna skangsan, Lyngdoh aganahachim.
Lok Sabha election-ni tarikrangko Election Commission parakkujaengoba ua mikkang bilsini April jaona kingkingde dingtang dingtang songrangona wenange manderangko grongna gita ka·dongsoenga ineba ua aganaha.
Gipin political dolrang da·o dipet an·tangtangni candidate-rangko paraktokkujaengon, uamangna skang campaign-ko a·bachengataniara una namgni ong·genma ong·jawa ua da·o dipet name ma·sikujaenga ineba Shillong parliamentary seat-ni NPP candidate parakataha.
“Da·o dipetde anga an·tangni miksonganirangko tale aganna sikkujaenga. Chingni campaign-ko a·bachengatahaon chinga nangani kri chingni miksonganirangko parakataigen,” ine ua aganaha.
An·tangni campaign ka·aniko ua mikkang bilsio seng·gnangan a·bachengatgen ineba Lyngdoh aganaha.
Lyngdoh-ni parakatani gitade, da·o dipet Shillong Lok Sabha seat-o me·chik candidate-rang saksaba seokako man·kujani gimin ian una namgipa cholba ong·enga.
