HNLC-ni ka·mikkenataniara aiao inmanani ong·a ine Sohra MLA paraka

SHILLONG: Mawmluh Cherra Cement Limited (MCCL)-ko sorkarini chipatna tik ka·engani gimin an·tangko dosi channe Hynniewtrep National Liberation Council (HNLC)-ni so·ote galna ka·mikkenataniko on·ahani gimin Sohra-ni NPP MLA Gavin Miguel Mylliem, aiao inmananiko parakataha.
“MLA ong·enggipa mandeko skanggipa changna HNLC bobil dol ka·mikkenatahani gimin ian aiao inmanani ong·a aro ian a·dokni electoral politics-o HNLC bobil dolni jak on·paaniko mesokanisa ong·enga,” ine Gavin aganaha.
HNLC bobil dolni uko so·ote galna ka·mikkenataniara badiaba political dolni ‘politics’ kal·na jotton ka·aniko mesokani gitaba ong·enga ineba ua aganaha.
MCCL-ko chipate company-o kam ka·enggiparangna VRS-ko ra·gate on·na sorkarini tik ka·engani gimin HNLC-ni uko dosi chananiara kragijani ong·enga ineba Sohra MLA parakataha.
Sohra constituency-ni manderang uko 2018 bilsionin MLA-na seokaha ine janapatengon, MCCL-ko chipatna manchianiara badiaba dilgipani chanchiani ong·ja indiba sorkarini chanchichenge ja·ku de·anisa ong·enga aro iana uko kam watchina HNLC-ni dabianiara kraani ong·jaenga ine Gavin parakataha.
“Manderang angko seokenga dipet anga uamangna dangdike on·anggen aro anga maming dakeba an·tangni constituency-ni manderangna kakketo dangdike on·anioni an·piljawa ine uamang ma·sia,” ine ua aganaha.
MCCL-ni mongsonggipa kamrangara Shella constituency-osa ong·a aro Sohra constituency-ni ning·o ong·jani gimin ua MCCL-ni kamrangna bang·e simsakna nangja ineba MLA talataniko on·angaha.
“Indake ong·genchimoba MCCL-o kam ka·enggiparangoni bang·a manderangan angni constituency-oni ong·ani gimin anga ia company-ko ra·dona jotton ka·engachim. Iako angbaksa kam ka·rimgipa manderangba ma·sia aro MCCL-ni bidingo anga bang·a changon Assembly-oba ku·rang on·aha,” ine Gavin aganaha.
MCCL-ko tangatpilchina sorkariko didiatengon, ia company dingtang dingtang a·selrangchisa siangenga indiba Sohra MLA-ni a·selde ong·ja ine ua talataniko on·angaha.
Sohra MLA-ni parakatani gitade, MCCL-ko tangatpilna gita komibeoba gong kror 188-mangni gita tangka paisarangko nanggnok.
MCCL-na a·dok sorkari, gong kror 350-na batpile koros ka·ani ja·manoba tangatpilna man·jahani gimin ia cement company-ko chipatsrangna tik ka·aha ine adita salrangna skangsan a·dokni Chief Minister Conrad K Sangma parakatahachim ine nikna man·a.