Sal 10-ni gisepon scholarship-rangko on·china dabia
SHILLONG: 2023-24 bilsini scholarship-ko chatro chatrirang man·tokkujaengani gimin Budbar salo, North Eastern Hill University Students Union (NEHUSU) aro Hynniewtrep Youth Council (HYC) dolrang, sorkarini kosako jegalaniko mesokna gita Shillong songjinmani MBOSE office a·palo jinma jingjengatanirangko dakangaha.
Scholarship-rangko chatro chatrirangna on·kujaengani gimin an·tangni suk ong·gijaniko parakatengon, chatro chatrirang aro mongsongbate kangal cholgrirangde college fee aro uandakgipa dingtang dingtang nanga korosrangko ka·na man·tokkujaenga ine HYC-ni president Roykupar Synrem parakataha.
“Chatro chatrirang an·tangtangni man·na nangenggipa scholarship-rangko man·tokkujaengani gimin da·alo chinga sorkarina gisik ra·ataniko on·na gita jingjengataniko dakenga. Chingni ma·siani gitade, 2023 academic session-na gital dorgasto galgipa chatro chatrirang aro renewal daktaigipa chatro chatrirangoniba 50 percent-de an·tangtangni scholarship-rangko man·tokkujaenga,” ine Synrem aganaha.
HYC president-ni aganani gitade, antigni ba antigittamni gisepon chatro chatrirangna scholarship-rangko watatgnok ine November 21 tarikon ku·rachakaniko on·ahachim indiba da·o 2024 bilsiko ga·tappilahaoba chatro chatrirang, an·tangtangni scholarship-rangko man·tokkujaengachim.
Chatro chatrirangni scholarship-rangko ta·raken on·china sorkariko didiatengon, “A·dokni Chief Minister, dingtang dingtang scheme aro project-rangna Delhi-ona re·ange ma·mong sorkarini dakchakanirangko bi·rongenga indiba chatro chatrirangni scholarship-ni giminde maming gisik nange mesokanian dongjaenga. An·chingni chadamberangan mikkangchi a·dokko dilnagiparang ong·ani gimin uamangni lekka poranio sorkario pilak nanga dakchakanirangko on·na nangchongmota,” ine Synrem parakataha.
Sal 10-ni gisepo chatro chatrirangna scholarship-rangko on·jagenchimode NEHUSU aro HYC dolrang, sorkarini kosako bilakbate jingjengatanirangko dakanggen ineba ua mikrakataniko on·angaha.
Scholarship-ni tangka paisarangko ma·mong sorkarini Minority Affairs Ministry watatkujaengani a·sel chatro chatrirangna scholarship-rangko on·na man·kujaenga ine re·anggipa December-ni 8 tariko, a·dokni Education Minister Rakkam A Sangma parakatahachim ine nikna man·a.
Chatro chatrirangni scholarship-rangko on·na man·na gita a·dok sorkari, Minority Affairs Ministry-oniko skanggipa instalment-ni tangka paisarangna sengkuenga aro da·o adita salrangni gisepon tangka paisarang sokbana ka·dongenga ine Sangma parakatahachim.
