SHILLONG: Batanggimin 2023 bilsio jekai Meghalaya Democratic Alliance (MDA)-II sorkari, a·dokni manderangna dangdike on·na jotton ka·aha apsan daken ia gital bilsioba uamang, a·dokni manderangna nambate dangdike on·angkuna gita an·tangtangko on·kangenga ine Bristibar salo, a·dokni Cabinet Minister aro MDA-II sorkarini ku·wattimgipa Paul Lyngdoh parakataha.
Lyngdoh-ni parakatani gitade, batanggimin bilsioba MDA-II sorkari, a·doko economy-ko tang·doatna rakbee kamrangko ka·ahachim.
“Tourism-ni kamrangko niatgenchimode an·ching bang·en dingtanganiko nikna man·aha aro a·palrangoniba bang·bea manderang a·dokona re·baaha. Batanggimin bilsirango skanggipa changna, December jaoba an·ching bang·en gipin a·songrangoni aro gipin a·dokrangoni re·bagipa manderangko nikna man·aha. Meghalaya a·doko dingtang dingtang festival-rangko ong·atanichi manderangna an·saoatanirangko on·na sorkarini kamko ka·anichi ia pilakan chu·sokna man·aha,” ine Lyngdoh aganaha.
Bilsi 10 ong·gipa MDA-II sorkarini chu·sokatgipa kamrangni gimin janapatengon, sorkarini chu·sokatna man·gipa kamrangoni mingsade CM Elevate program-chi chadamberangko bak ra·atanian ong·aha ine MDA-II sorkarini ku·wattimgipa parakataha.
Assam-Meghalaya simani bidingo gnigipa changna agangrikanikoba MDA-II sorkarini chu·sokatgipa kam mingsa ong·a ine janapatskaengon, “Assam aro Meghalaya sorkarirang, pangnan agangrikjringe, simarango so·sojengjeng ong·anirangko komiatna man·aha,” ine Lyngdoh aganaha.
MDA-II sorkarini ning·o niam retirangko name rakkina man·aha ine janapatengon, a·doko songdongenggipa manderang da·o naljokanirangko man·engaha aro so·sojengjeng ong·anirangba skango gita ong·jaengaha ine Lyngdoh parakataha.
Drugs ba pekatgipa sam jakkalanirangko warachakenggipani bidingo janapatskaengon, a·doko niam gri sam jakkalgipa aro badinggiparangko bilakbate nirok sandianirangchi bang·en rim·na man·aha aro PIT NDPS Act-ni ning·o rakgipa niamrangkoba ra·gataha ine Lyngdoh, jean a·dokni Social Welfare Minister-ba ong·engachim, kobor ra·timgiparangna parakataha.
“Game ge·e cha·enggiparangni namgnina kam ka·anirangko niatgenchimoba ia sorkari, a·dokni dingtang dingtang biaprango game ge·e cha·enggiparangna bang·en namgnirangko on·na man·aha. Home (police) department-ko niatgenchimoba chinga sak 3000-mangni gita police constable-rangko kamo rimdapna man·aha,” ine Lyngdoh aganaha.
Arts & Culture aro Tourism department-ni gita chu·sokatgipa kamrangni bidingo janapatskaengon, a·doko exchange program-rangko ong·atjringanichi bang·bea chadamberangan namgnirangko man·tokaha aro dingtang dingtang festival-rangko ong·atanichi bading chiwale cha·enggiparangsan ong·aigija dingtang dingtang jakni kamrangko ka·e cha·enggiparangba namgnirangko man·rikaha ine MDA-II sorkarini ku·wattimgipa parakataha.
A·dokni manderangna nambate dangdike on·na sorkari on·kangenga: Paul Lyngdoh
Date:
Share post:
