Sorkari baksa agangrikaniko HNLC-ni ra·pilanina BJP suk ong·gijaniko paraka

SHILLONG: Hynniewtrep National Liberation Council (HNLC) bobil dolni tom·tomaona re·bapilna gita a·dok aro ma·mong sorkari baksa agangrikanio, bobil dolni dabianirangko chu·sokate on·jaenga ine matnangenba, sorkari baksa agangrikaniko ra·pilahani gimin Bharatiya Janata Party (BJP) jajrengchakaniko parakataha.

Iani bidingo kobor ra·timgipa manderang baksa agangrikengon, HNLC bobil dolni tom·tomaona re·bapilna gita agangrikaniko ra·pilaniara a·dokna kenchakna nangani ong·enga ine HNLC bobil dolni dilgiparangko tom·tomaona re·bachina Meghalaya a·dokko nirokenggipa BJP-ni dilgipa Chuba Ao didiataha.

Maini gimin HNLC bobil dolni dilgiparang, sorkari baksa agangrikaoni an·pilenga da·o dipet uamang tale am·sandikuja ineba Ao aganaha.

“Indake ong·genchimoba chinga BJP-ni gita Meghalaya a·doko tom·tomaniko nangnikengani gimin HNLC bobil dolko tom·tomaona re·bachina nangnikenga,” ine Ao aganaha.

Apsan daken, BJP Meghalaya-ni state president Rikman G Momin-ba HNLC bobil dolko re·mikkangbae, a·dok sorkari ba ma·mong sorkari baksa tom·tomanina agangrikechina gita didiataha.

“HNLC bobil dolni sorkari baksa agangrikanio an·pilaniko knasoe chinga suk ong·ja,” ine Momin aganaha.

HNLC bobil dolni dabianirangko chu·sokate on·ani giminde ua mamingkoba aganna jechakskaaha.

Tom·tomaniona re·bapilna sorkari baksa agangrikaniko ra·pilna Budbar salo, champengatako man·gimin Hynniewtrep National Liberation Council (HNLC) bobil dol, ma·mong sorkarina sedoatahachim.

Iani bidingo Ministry of Home Affairs (MHA) Northeast-ni Advisor AK Mishra-na sedoatengon, sorkari baksa agangrikanio HNLC-ni dabianirangko sorkari chu·sokatna gisiko nangjahani gimin HNLC-ni chairman-cum-commander-in-chief Bobby Marwein aro general secretary-cum-publicity secretary Sainkupar Nongtraw, suk ong·gijaniko parakatahachim.

HNLC-ni nangchongmotgipa dabianirangkon sorkari chu·sokate on·na man·jaenga ong·ode ja·mano HNLC-ni political-ni gita dabianirangkoba sorkari chu·sokate on·jawa ine ma·mong sorkarina sedoatgipa chittio HNLC-ni dilgiparang parakataha.

HNLC-ni seachi parakatani gitade, uamang sorkarina uamangni mingbonga dabianirangko on·ahachim aro ia mingbonga dabianirangoni minggnikosa sorkari chu·sokate on·aiahachim.

HNLC-ni minggittam dabianirang, chong·motan HNLC-ni kosako ban ka·aniko ba champengataniko ra·galpilchina, HNLC-ni dilgiparang aro membor-rangni kosako bangki dongenggipa case-rangko kema watchina aro HNLC-ni kamrango jak donga ine rim·ako man·gipa manderangko watpilchina dabianirangkode sorkari chu·sokate on·kujaengachim.