Shillongo tourist-rang ja·donggatoka
TURA/SHILLONG: A·songo hit and run case ba a·selni kosako Ma·mongni niam ra·gatnasienggipa-ni kosako Tourist cab driver-rangni jingjengatani a·sel, Garo Hills gimikon tourist taxi service-rang neng·nikataniko man·aha.
Bharatiya Nyaya Sanhita (BNS)-ko skangni niam gitcham IPC-ni palo ra·gatskana am·enga aro hit and run case-ni adita niamrangkoba dingtangatahachim, jeon sastini somoi aro dai-dondokoba bang·en bariataha. Bilsi 163 ong·pilgipa Indian Penal Code-ni palo Bharatiya Nyaya (Second) Sanhita (BNS)-ko ra·gatna gita President-ni namnikpaaniko man·ahachim.
Assamo aro Shillongo tourist gari salgiparangni jingjengatani a·sel, a·doko, tourist-rangni songre-songbatanio namen neng·nikataniko man·aha.
Federation of Shillong Hotels-ni president, Parambir Singh Sehdave-ni aganani gitade, mi Bristibaro bang·a tourist-rangan uamangni re·bagniko dontongattokaha, uandake mijaloba apsan obostarangan ong·aha.
Tourist driver-rang, uamangni jingjengataniko ra·galna gita chanchiahaoba a·dokona tourist-rangni namedake sokbanade sal 3-4 rang nanganignok ineba ua aganaha.
Indakeba nikatna gita man·a je, hit and run-ni niamko sorkarini ra·gatna am·gipani bidingo namnikgijaniko mesokna gita tourist taxi driver-rang Sukrobaro Shillong aro Guwahati-o jingjengataniko dakenba garirangko saltokjahachim.
Maniani sal-somoirang, Shillong songjinmaona tourist-rang bang·en sokbaaniko niksona man·ahachim, jeon Khyndailad aro Laitumkhrah jolrango mongsongbate nikna man·a.
Indake ong·engon, January 31-ona kingkingde 100 percent-an ong·pile hotel-rangko a·kangpilachim.
