SHILLONG: A·doko niamgri bikotenggipa koelarangko walo walo trak garirango nangana batpile parake ong·en gate salenga ine Tura-ni BJP MDC Bernard Marak aganaha.
Dongimin niamna badepile koelarangko gatenba maming lekka gri koela garirang walo jakgitele salenga, jemangan trak bolprako Tg. 1,25,000/- mangni gita entry fee-rangko gamenga, uarangnide sorkario maming hisap ki·tap dongja aroba Autonomous District Council (ADCs)-na maming royalty tax gamaniba dongja, jean Supreme Court-ni rai on·giminko pe·a gita ga·aka, Marak aganaha.
Ritcha ritcha trak garirang niam gri Era Aning aro Jadigittim-oniko koelarangko bikote salenga aro apsan biaprangon dane dontokenga, jean Supreme Court-ni niamko pe·manchaa ga·aka ine Tura MDC aganaha.
South Garo Hills-ni Nongalbibra Police Station-ni ning·ogipa Era Aning aro Jadigittim-oniko niamgri koelarangko bikote salengani gimin FIR-rangko on·pilahachim indiba uko champengna gita maming ja·ku de·ani dongjaenga ine matnangan baksa iani kosako kamrangko ka·china gita Tura MDC, Nongalbibra police station-na badi ka·aha Court-ni raiko dal·e ra·enba niamgri kam ka·enggiparangni kosako ja·ku de·china gita didianikoba on·aha
