SHILLONG: Garo Hills Autonomous District Council (GHADC)-o tangka paisa jakkalsretaniko rim·a man·ahani giminsa an·tangtangni manderangko chel·chakna gita Meghalaya Lokayukta-ni officer-rangko NPP-chi dilenggipa MDA sorkari, kamoniko ra·galataha ine Voice of the People’s Party (VPP)-ni matnanganiko Sombar salo, sorkari jegalataha.
VPP-ni matnanganirangko jegalenba talataniko on·angskaengon, Meghalaya Lokayukta Act 2014-ni ning·o dongimin niamrango pangchakesa a·dok sorkari, Meghalaya Lokayukta-ni officer-rangko kamoniko ra·galna nangaha ine a·dokni Cabinet Minister aro National People’s Party (NPP)-ni dilgipa Ampareen Lyngdoh parakataha.
Kamoniko ra·gala man·gipa Lokayukta-ni official sakgittamko kamo ra·pilchina gita dabie, NPP-chi dilenggipa MDA sorkarini kosako jingjengatanirangko dakna gita VPP, ka·mikkenataniko on·angahachim.
Kamoniko ra·gala man·gipa official-rangara, Inquiry & Prosecution-ni Director (gitcham IPS officer) J Rymmai aro Inquiry-cum-Investigating Officer sakgni R Pde aro Anil K Sangma ong·achim.
Ia officer sakgittamko ra·galani bidingo talataniko on·angengon, Meghalaya Lokayukta Act 2014-ni ning·o dongimin niam gitade, je officer-rangan sorkarini kamo ong·kuengachim, uandakgipa officer-rangkosa Lokayukta-ni investigation official dake seokna man·a indiba ia sakgittam official-rangara kamoni neng·takgimin officer-rangsa ong·achim ine Lyngdoh parakataha.
“Meghalaya Lokayukta Act 2014-ni Section 10 (2) aro 11-o pangchake, Lokayukta-ni officer-rangara department-onisa ong·na nanga aro sorkari kamoni neng·takgimin mandede department-oni ong·na man·ja. Iano pangchakesa ia officer sakgittamko ra·gale, uamangni biapo dingtang officer-rangko kamo donatskana nangaha,” ine NPP Minister aganaha.
Lokayukta-ni office-ara jakgitelgipa aro kenani gri ong·gipasa ong·na nangani gimin Lokayukta-ni kamrango jak on·pajachina gita a·dokni Chief Minister Conrad K Sangma-ko VPP-ni mikrakatgipana aganchakaniko on·angskaengon, Meghalaya Lokayukta-ni officer-rangko seokanio a·dokni Chief Minister ba a·dok sorkari maming dakeba jak on·paa dongja ine Lyngdoh parakataha.
Chief Minister-ni bak nanggipa mande baksana GHADC-o tangka paisarangko jakkalsretanio jak donggipa manderangko jokatna gitasa Lokayukta-ni investigating officer sakgittamko MDA sorkari, kamoniko ra·galataha ine salsa skangsan VPP-ni president Ardent Miller Basaiawmoit matnangatahachim ine nikna man·a.
Ra·gala man·gipa officer-rangni biapo sorkari, IAS officer IW Ingty-ko Inquiry & Prosecution-ni Director songe, MPS officer sakgittam, chong·motan Chalang G Momin, John C Sangma aro Baniateilang Diengngan-ko membor-na songskaahachim.