SHILLONG: Da·o dipet ma·mongo Trinamool Congress (TMC)-ko dilenggiparangoni maming u·iatanirangko man·soa dongkujaengani gimin ia bilsini gisepo ong·atna sienggipa Lok Sabha election-o Congress dol baksa bakrime Meghalaya a·dokni damgni constituency-rango susaani gimin a·dokni TMC-ba aganna gita man·kujaenga ine u·iataha.
TMC-ni state president Charles Pyngrope-ni u·iatani gitade, high command-oni maming u·iatanirangko man·soa dongkujaengani gimin ia Lok Sabha election-o Congress dol baksa bakrime susagenma susajawa name aganna man·kujaenga.
“Ma·mongo TMC-ko dilenggiparang angna iani bidingo maming u·iata dongkujani gimin anga iani bidingo da·o dipet mamingkoba aganna man·kujawa. Iako an·ching songbadrangonikosan poraisona man·engkua indiba angnade ma·mongonin maming u·iata dongkuja,” ine Pyngrope, kobor ra·timgiparangna aganaha.
Meghalaya a·dokoba Indian National Developmental Inclusive Alliance (INDIA)-o bakrimenggipa dolrang nangrime susana nanggen ine u·iataniko man·soahaosa uamang iani bidingo chanchitaigen ineba Pyngrope parakataha.
Lok Sabha election-ni bidingo TMC-ni high command baksa agangrikanirang dongahama ine sing·anina aganchakaniko on·angengon, “Meghalaya a·dokni damgni Lok Sabha constituency-rango an·tangtangni candidate-ko susaatgenma ma songbadrango sea gita INDIA-o bakrimenggipa dolrang baksa susana nanggen, iani bidingo anga high command-o sing·sandiataha indiba da·o dipet anga maming aganchakanirangko man·sokujaenga,” ine TMC-ni state president aganaha.
Ia Lok Sabha election-o TMC baksa bakrime susajawa aro iani bidingo high command baksa agangrikmanaha ine Congress dolde a·kangatskaahachim ine nikna man·a.
Ma·mongo BJP-chi dilenggipa NDA sorkariko be·atna gita Congress aro TMC dolrangko man·chape dingtang dingtang opposition dolrang, INDIA-ko bikotskaahachim aro a·songni bang·a biaprangon INDIA-o bakrimenggipa dolrang ia chang Lok Sabha election-o ma·sichakgrike susana tik ka·ahachim.