TURA: North Garo Hills a·jani Ildek A·kong songo tarigipa RCC dolong aro Adokgre-Mangsang ramako tariani bidingo A·chik Holistic Awakening Movement (AHAM) Adokgre unit, a·dokni Chief Minister Conrad K Sangma-na badi ka·e sedoataha.
Adokgre-Mangsang ramao rikenggipa dolongni bidingo a·dokni Chief Minister-na badi ka·e sedoatengon, Ildek Akong songo rikenggipa RCC dolongan ia Adokgre-Mangsang ramani mongsonggipa dolong ong·engachim aro ia dolongko 2019 bilsion rikna a·bachengatahaoba kamrangko matchotgija kam bijangchion galchipaiaha ine AHAM Adokgre unit parakataha.
AHAM Adokgre unit-ni parakatani gitade, ia dolongko rikani bidingo RTI ka·e am·sandion, ia dolongna a·bachengon gong 12,29,89,000 tangkarangko chamahachim ine ma·sina man·aha.
Adokgre-Mangsang ramako tariani bidingo janapatangkuengon, ia ramako tariani kamrang namen ka·sinenga aro ia ramako tarina gita a·bachengo chamgipa gong kror 210-oniko gong kror 123-ona sorkari komiataha ine AHAM Adokgre unit, suk ong·gijaniko parakataha.
“Garo Hills-o ia Adokgre-Mangsang ramako tariani project-an dal·batsranggipa ong·achim maina ia ramako tarina gita sorkari a·bachengode gong kror 210-ko chamahachim indiba ja·mano korosko gong kror 123-ona komiataha. Una agreba, ia ramako tariani kamrang ka·sinengani a·sel ramako re·ruraenggiparang aro jolo songdongenggipa manderang neng·nikanirangko chagrongna nangtokenga,” ine AHAM Adokgre unit parakataha.
Ia ramara Adokgre, Rongjeng aro Mangsang jolrango songdongenggipa manderangna namen nangchongmotgipa rama ong·a ine janapatengon, ia ramako tarina gita chamgimin korosko nipiltaichina aro a·bachengo chamgimin koros gitan kamko ta·raken matchotatchina AHAM Adokgre unit, a·dokni Chief Minister-ko didiataha.