TURA: South Garo Hills a·jani Chokpot sub-division-ni ning·o donggipa Budugre songo niam gri ro·ongrangko bikotenga ine matnangatenba, ia jolo niam gri ro·ong bikotaniko dontongchina Niksamso Garo Community Organisation (NGCO) dabiangaha.
“Budugre songo donggipa Dareng chisamrangoniko niam gri ro·ong bikotengani a·selan ia chiringna aro chio donggipa na·tok na·batrangna nangchakeaniko ra·baengaha. Ia Dareng chiringonikon ka·ma jolrango donggipa songni manderangba ringna aro dingtang dingtang kamrangna jakkalengachim indiba ia chiringonikon niam gri ro·ong bikotengani a·sel songni manderang neng·nikanirangko man·engaha,” ine NGCO parakatenba, ia biapo niam gri ro·ong bikotaniko ta·raken dontongchina mikrakataniko on·ataha.
Budugre songo niam gri ro·ong bikotaniko dontongjagenchimode mikkangchi rakbata ja·kurangko de·anggen ineba NGCO parakataha.