SHILLONG: West Garo Hills a·jani Dadenggre Sub-Division ning·o Government LP skulrangna assistant teacher-rangko seokanio Tribal-rangoni bang·bata candidate-rangkon kamo ra·jahani gimin Meghalaya a·dokni Akhil Bharatiya Vidyarthi Parishad (ABVP) aro Bharatiya Janata Party (BJP)-ni a·dok sorkariko matnangatani ja·man, Unreserved Category (UC)-o sorkari LP skulrangna skigiparangko seokanio maming ong·gijani dongja ine Sukrobar salo, a·dokni Education Minister Rakkam A Sangma talataniko on·ataha.
“Skigiparangko man·na nangani krisa kamo seokaha aro candidate-rangna uamangni performance-o pangchake mark-rangko on·na gita interview ra·gipa manderango chu·gimik bilrang donga,” ine Sangma aganaha.
Ia skigiparangko unreserved category-nasa kamo ra·aha ine janapatengon, “Uamang maikai porikka aro interview-rango mesokaha ukode chinga ma·sija indiba candidate-rangni mark man·ani krisa result-rangkode parakaha,” ine Education Minister aganaha.
Education Minister-ni talataniko on·angani gitade, candidate-rangko interview ra·esa kamna seokaha aro candidate-rangko seokanio maming ong·gijani dongjachim.
Iani bidingo mamingkoba agandapna jechakangengon, ia result-ko interview ra·gipa dolrangsa tik ka·aha aro iani bidingo maming chanchidapna nanganirang dongjaha ine Sangma parakataha.
Dadenggre sub-division-ni ning·o Govt LP skulrangna assistant teacher-ni kamo ra·na gita MTET pass ka·gimin candidate-rangko re·anggipa December jao aro ia January jani 4, 5, 6, 8 aro 9 tarikrangoba personal interview-ko ra·e, Unreserved Category (UC)-ni result-ko adita salrangna skangsan Education department parakatahachim ine nikna man·a.
UC-ni result-ko parakatanio gimik sak 34 candidate-rangko skigipani kamna ra·ahachim indiba ia sak 34 candidate-rangoni sak 33 skigiparangkode gipin jatni candidate-rangkosan ra·gopaiahani gimin ABVP Meghalaya aro BJP dolrang, suk ong·gijaniko parakatenba, Unreserved Category-o skigipani kamna seokaniko donkuchina gita sorkariko didiatahachim.