Shillong: Koborna u·iata gitade mijal attamni bako Ri Bhoi a·jani Quinine songo National Highway 6 ramao, National Highway Authority of India-ni kam ka·gipa dumper truck-ni ki·sangchipak re·bamitingo saljetdapenba janggi tangko gimaatna nangaha.
Sianggipa, jekon Bilyfullstar Marbaniang (35) ine ma·sina man·aha, ua Ri Bhoi a·jani Umran Dairy-oni ongachim, a·sel ong·ao ua sina nangaha.
Kobor man·soa gitade attamni 3 bajimango ia obosta ong·aha. Ia kam ka·gipako, uamangni kam ka·chakramo garirang maming neng·nika gri re·na man·a gita nirokchina donahachim, indakmi-tingosa MP65 H0287 nom-boro segatgimin dumper truck-chi saljetdapako man·aha. Ia a·sel ong·anio ua a·damon sina nangaha. Kobor man·soa gitade, obosta ong·a ja·manan truck salgipa ua biaponi joke katangaha.
Sianggipani manggisiko post-mortem ka·na gita Nongpoh Civil Hospital-ona ra·angaha. Ri Bhoi Police a·sel ong·chakram biapni sepang jolrango sandirokaniko dakenga aro kate chakenggipa driver-ko rim·na kam ka·enga.
