TURA: West Garo Hills a·jani Rajabala jolrango niam gri ita so·gipa kar-kanarangko chalaiengani a·sel songni nokni man-derang neng·nikanirangko man·tokenga ine matnang-atenba, ia niam gri chalai-enggipa ita karkanarangko chipatchina West Garo Hills a·jani Deputy Commissioner-ko di-diataha.
West Garo Hills a·jani Deputy Commissioner-na badi ka·doangani gitade, Rajabala police station-ni ning·o donggipa dingtang dingtang songrang, jekai Sakmal, Ramjonggre, Gorband (Singwilgre), Silkata, Kharigaon aro Sobribari songrango dam 70-na baten ita so·gipa karkanarangko niam gri chalaitokengachim.
“Ia ita karkanarangko Forest & Environment Ministry-ni dongimin niamrangko pe·e, olakki-chakram, manderangni nokrang, chiring chibi-sikrang aro uandakgipa biaprangoni metre 5-oni metre 100-ni ning·on chalaitokenga aro ita karkana damsaoni dam-gipinona komibeoba kilometre 1 chel·grikna nanga ine dongimin niam-koba manijaenga,” ine Rajabala jolo songdong-enggipa manderang parakataha.
Ia ita karkanarangko niam gri chalaiengani a·sel balwarang moila ong·atako man·engan baksana ita karkanarangko rikna gita niam gri bolrangko den·-enga aro a·arangko bakenga ineba jolo song-dongenggipa manderang parakataha.
Ita karkanarangna dal·dalgipa bolrangko salrurarongengani …
a·sel rama jal·langrangba nosto ong·atako man·tokengaha ine janapatengon, ia ita karkanarangko niam gri bi·sarangkoba kam ka·a-tenga ine Rajabala jolni manderang, West Garo Hills a·jani Deputy Commissioner-na badi ka·doataha.
Ia jolrango ita karkanarangko niam gri chalaienganichi NGT, MSPCP, Child Labour Act aro uandakgipa dingtang dingtang niamrangko pe·a ga·akenga ine janapa-tengon, ia jolrango niam gri chalaienggipa ita kar-kanarangko ta·raken chipatchina gita jolo song-dongenggipa manderang, West Garo Hills a·jani Deputy Commissioner-ko didiataha.
Official-rangni u·iatani gitade, ita karkanarangko chalaiengon, manderangni dongchakgipa biaprangoni komibeoba metre 300 chel·na nanga, skul ba health centre-rangoni komibeoba metre 500 chel·na nanga, ita karkana damsaoni damgipinona komibeoba metre 500 chel·grikna nanga, chiring chibisikrangoni komibeoba metre 500 chel·na nanga, ge·a gamanio jakkalenggipa a·a ong·na nangja aro State Pollution Control Board-oniko NOC aro gipin certificate-rangko ra·chengna nangachim.
