Ri Bhoi a·jani A·chik me·chik saksako PM Modi mittelpila

NEW DELHI: Bristibar salo, a·songni Prime Minister Narendra Modi, a·song gimiko Viksit Bharat Sankalp Yatra (VBSY)-ni namgniko man·enggipa manderang baksa video conferencing gita agangrikangaha aro ia tom·anio a·song gimiko VBSY-ni namgniko man·enggipa manderang bakko ra·angtokaha.
Ia program-o Union Minister-rang, MP-rang, MLA-rang aro joltangtangni dilgiparangba bak ra·angtokaha.
Meghalaya a·dokoni Ri Bhoi a·jani Silme Marak-ba a·songni Prime Minister baksa agangrikna cholko man·aha aro unbaksa agangrikanio a·songni Prime Minister, uni dingtang dingtang scheme-rangni bidingo Hindi ku·sikchi srange aganna man·ahani gimin uko mittelpilangaha.
“Na·a Hindi ku·sikko namen srange aganna man·a haida angna bateba na·an nambate aganna man·akon. Na·simang gita dake an·tangtangko on·kange kam ka·na gisiko nanggipa manderangan chinga sorkarini scheme-rangko a·songo songdongenggipa mande sakantiona sokatna miksonganiko chu·sokatgiparang gita ong·a. Na·simang gita dakgipa manderangni a·selan angni kam namen altubatatako man·enga. Na·an nang songni ‘Modi’ ong·a,” ine Prime Minister, Silme Marak-ko mittele aganaha.
Silme Marak-ara songtango chonbegipa dokkanko chalaigipa me·chiksan ong·aiachim indiba ua self help group (SHG)-o nape kam ka·na a·bachengani ja·man uni janggi tangani dingtangna a·bachengaha. Da·o ua songtango gipin me·chikrangkoba SHG-rango biming segatna dakchake on·enga aro ua dol 50-na baten SHG-rangko bikote on·naba dakchakaha. Ua PM Kisan Samman Nidhi aro uandakgipa dingtang dingtang scheme-rangko man·enggipa me·chikba ong·a.
Silme Marak, songtango customer service point-koba chalaienga aro manderangna sorkarini scheme-rangko ra·na gita dakchake on·enga. Uni SHG, cha·anirangko tarigipa dol ong·a aro uni iandakgipa kamrangna aro ka·donganina a·songni Prime Minister-ba uko mittelpilaha.