TURA: Re·anggipa January-ni 15 tariko, Rongjeng-o songdonggipa chadambe saksani manggisiko North Garo Hills a·jani Rongbu songo man·ani ja·man, ia chadambeko so·ote galani gimin A·chik Holistic Awakening Movement (AHAM) Rongjeng unit, raken jegalataha.
Ia chadambeko so·otani bidingo sianggipa chadambeni gumetang, Rongjeng police station-o FIR ka·aha aro iani bidingo police-rang da·o sandirokna a·bachengataha.
FIR-o janapani gitade, sianggipa chadambe Udoy M Sangma-ni gariko, West Khasi Hills a·jao donggipa Shallang songni mande sakbonga, Assam a·dokni Goalpara a·jao donggipa Dudhnoi-ona para ra·angaha aro uamang una gong 4000-ko gamna ku·rachakahachim. Ia garini nomborara AS-01EQ 7779 ong·achim.
Apsan salon, garini nokgipa aro driver Udoy Sangma, an·tangni jikgipana mobile location-ko watataha indiba uni ja·mande uni mobile phone off ong·aiahachim.
“Uni manggisiko January 15 tarik pring 7:30 bajimango Upper Rongbu songni manderangsa nikaha indiba uni gari aro uni mobile phone-de uko so·otgipa manderangan ra·e kataha,” ine sianggipa chadambeni gumetang Anthony G Momin, FIR-o parakataha.
Indake ong·engon, ia chadambeko maming a·sel gri iandake so·ote galahani gimin AHAM Rongjeng unit raken jegalataha aro dos dakgipa manderangko ta·raken rim·enba rakbatgipa sastirangko on·china dabiangaha.
Sianggipa mandeni nokdangna compensation-ko gamchina gitaba AHAM Rongjeng unit, a·dok sorkariko didiataha.