Secretariat mikkango VPP MLA, police-rang baksa nanggrika

SHILLONG: Sukrobar salo, Mawlai-ni Voice of the People’s Party (VPP) MLA Brightstarwell Marbaniang, Secretariat-ona napdraangna jotton ka·miting somoio police-rang champengsoenba, DC office a·palo adita somoirangna dolgnini gisepo nanggrikangaha.
VPP dilgiparangni Secretariat-ona re·jomangna bi·aniko a·dok sorkari aganchakninggija dongahani gimin DC office a·palo donggipa footpath-o baditaba kontarangna senge dongani ja·man, Mawlai-ni MLA baksana VPP-ni dilgiparang, Secretariat-ona napdraangna jotton ka·on, police-rang uamangko champengsona jotton ka·skaaha.
VPP-ni dilgiparangko champengsona jotton ka·on, VPP-ni membor-rang ka·a nange uamangni MLA-ko iandake jak sokjachina police-rangko aganaha. Uni ja·man VPP-ni MLA sakgittamko Secretariat-ona re·angna on·enba gipin membor-rangkode DC office sambao sengatchina gita Marbaniang, District Administration-ni officer-rangko aganaha.
District Administration-ni official-rangba VPP-ni dilgiparangko iandake napdrajachina aganskaaha.
Iani bidingo ja·mano kobor ra·timgipa manderang baksa agangrikengon, “Lokayukta-ni official sakgittamko a·dok sorkarini kamoniko ra·galaniara niamni a·palo ong·engani giminsa chinga da·alo sorkarini kosako jegale jingjengataniko a·bachengataha. Chinga VPP-ni membor-rang, tangka paisa jakkalsretaniko warachakna aro ong·gija kamrangko jegalna chakataha aro iakon chinga dakangkugen. Ian a·songo songdongenggipa mande sakantina on·gimin bil ong·a,” ine VPP-ni general secretary Ricky Syngkon parakataha.
Ra·gala man·gipa Meghalaya Lokayukta-ni official sakgittamko kamo ra·pilchina dabiani bidingo Chief Minister Conrad K Sangma-chi dilenggipa MDA-II sorkari, maming aganchakaniko on·jahani gimin Sukrobar sal dipet pring 10:00 bajioni attam 4:30 bajiona Meghalaya Secretariat mikkango asonge jingjengatna gita VPP tik ka·angahachim.
Uni ja·manba a·dok sorkari, maming aganchakaniko on·jagenchimode, Meghalaya Secretariat mikkango asonge jingjengataniko Sombar saloni dakangtaigen ine VPP-ni dilgiparang parakataha.
Ia jingjengatanio bak ra·na re·baenggipa pilak manderangkon so·sojengjeng ong·atani kamrangko ka·jachina aro tom·tomao jingjengatchina gitaba VPP-ni ku·wattimgipa Batskhem Myrboh didiatahachim.