Koch Youth Festival-ko salgnina SWGH-o ong·atanga
AMPATI: Re·anggipa January 17 aro 18 tarikrango salgnina, Meghalaya Koch Students Union (MKSU)-ni gita gnigipa Koch Youth Festival-ko South West Garo Hills a·jani Kumligaon songo ong·atangaha aro ia festival ba manianiko ong·atanio Koch jatni kal·susaanirangko, cha·ani ringanirangko aro ma·manti daka rikanirangko mesokangaha.
Skanggipa salo, dingtangmancha social awareness session-ko Prabhakar Koch-ni dilanichi ong·atangaha, jeon Dalu-ni MDC Promod Koch, District Disaster Management Authority Officer Debojit Koch, MePDCL-ni Executive Engineer Alakesh Koch, Junior Rural Development Officer Pooja Koch, Horticulture Development Officer Apojit Koch aro Meghalaya Koch Association (MKA)-ni dilgiparangba bakko ra·angtokaha.
Gnigipa salo, Tura-ni MP Agatha K Sangma, mongsonggipa sokgipa ong·e bakko ra·angskaaha aro tom·anio ua jinmana aganprakangengon, jatko aro an·tangtangni janggi tangani gadangko tang·doatna gita sorkarini on·enggipa scheme-rangko ra·china Koch chadamberangko didiangaha.
Koch songsalna aro mongsongbate chadamberangna kamrangko ka·engani gimin ua dingtangmancha MKSU-koba mittelpilangaha.
Ia tom·anio dongpae bakko ra·anggipa gipin manderangara, Betasing-ni gitcham MDC Nripendra Koch, MKA-ni president Jibananda Koch, Koch Literature Society-ni president Nirman Koch aro gipinrang ong·a.