SHILLONG: KHADC aro JHADC election-ni tarikko ta·raken parakatchina gita Robibar salo, United Democratic Party (UDP)-ni dilgiparang, a·dok sorkariko didiataha.
“Chinga UDP dolni gita, KHADC aro JHADC election-ni tarikko ta·raken parakchina nangnikenga,” ine UDP-ni working president Titosstarwell Chyne aganaha.
KHADC aro JHADC-ni term-ko sorkari ra·dodapna miksonganirang dongenga ine kobor man·soenggipani bidingo sing·anina aganchakaniko on·angengon, da·o dipet KHADC aro JHADC-ni term-ko ra·dodapgenma ra·dodapjawa sorkarioni maming paraka dongkujaenga ine Chyne aganskaaha.
“KHADC aro JHADC-ni term-ko sorkari ra·dodapgenchimode maio pangchake ra·dodapenga ukosa chinga ma·sina nangnikenga,” ine KHADC-o UDP parliamentary party-ko dilenggipa Chyne aganaha.
KHADC aro JHADC-ni election-ko sorkari somoi gitan ong·atgenchimode UDP da·o pilakni gitan tarisomanaha ineba ua aganaha.
UDP working president-ni aganani gitade, KHADC aro JHADC-ni term-ko ra·dodapna siengama ma election-ko somoi gitan ong·atna miksongenga iako sorkari ta·raken jinmana u·iatna nangenga.
KHADC aro JHADC-ni term-rang re·baenggipa March jani 5 tarikon bon·engahachim ine nikna man·a.
KHADC aro JHADC-ni term-ko ra·dodapatna miksonganirang donga ine adita salrangna skangsan, National People’s Party (NPP)-chi dilenggipa Meghalaya Democratic Alliance (MDA) sorkariko Voice of the People’s Party (VPP) matnangatahachim.
Iani bidingo kobor ra·timgipa manderang baksa agangrikengon, KHADC aro JHADC-ni term-ko minggni miksonganirang dongani giminsa NPP-chi dilenggipa sorkari, ra·dodapna miksongenga aro sorkarini miksonganirangko uamang namen ma·sienga ine VPP-ni ku·wattimgipa Batshkem Myrboh parakatahachim.
“Skanggipa a·selde NPP-chi dilenggipa MDA 2.0 sorkari, a·doko tangka paisani gita neng·nikanirangko ra·baahani giminsa ia district council damgnini term-ko ra·dodapatna miksongenga. District council damgnini election-ko ong·atna gita sorkario tangka paisarang dongjaha gita nikenga. Gnigipade a·dok sorkari, da·o district council election-o an·tangtangni candidate-rang ama cha·gen ine ma·sisoengani giminsa uamangna seat-tango asongna cholko on·na nangnikkuenga,” ine VPP-ni dilgipa aganahachim.
NPP aro NPP baksa bakrimenggipa dolrang ba da·o ong·enggipa MDC-rang, district council-ona re·bapilaniara namen neng·beani ong·gnok ineba ua aganahachim.
“An·tangtangni membor-rang, da·o man·enggipa bil aro cholrangko ra·e dongkuchina gitasa NPP-chi dilenggipa MDA sorkari, KHADC aro JHADC-ni term-ko ra·dodapna jotton ka·enga,” ine Myrboh aganahachim.