Game cha·giparang, Mongmarangko goe galna manchia
Mawkyrwat: Rakarini somoio, South West Khasi Hills District-ni Ranikor Civil Sub-Division-ni ning·ogipa Nongnah-Ranikor jolo donggipa Mongmja jak-ko sorkari a·rikgalatna man·rongjani a·sel, a·jolo donggipa manderang bilsiantian uamangni game-ge·e man·gipa bolam biterangko gimaatna nangrongani gimin namen namen duk man·tokengon, bilsirikkitan uamangni a·bani bosturangko Mongmarang nosto ka·simaiode okumu chake sigen ine chanchienba Mongmarangko goe galana agrede uamango maming gipin chol dongja ine game cha·giparang chanchiaha, maina uamangni neng·e-dike gama-ge·anirangko Mongmarangni a·selan ratna-tetna man·rongjachim.
Indake re·anggipa Sonibaro Ranikor Area Farmers Association (RAFA), a·jolo donggipa dingtang dingtang songni game ge·e chagiparang baksa Nongnah songo damsan tom·aniko ong·ataha, aro mongmarangko goe galna gita tik ka·tokaha, jeon uamangni ge·a-gam·anirangko, nok-jamrangko nosto ka·simaiachim.
Uamangni a·jol donggipa buringni mongmarangko rike galatchina gita Sorkariko aganao chu·sokatjani gimin RAFA aro game cha·giparang, mongmarangko goe galsrangna gita chanchitokaha.
Jinma tom·anio RAFA president Michael Lyngdoh aganaha je, da·o rakarini somoio, mongsongbate sal·a, gue, pan, tespat aro gipin gipin bari-baganni bosturangko rakari-akkarini ong·enga, indakmitingo mongmarangni a·sel bari-bagantangona re·angnan man·jaenga, Mongmarangan manderangkosa riksoaia. Uni aganani gitade ua aro gipin adita game cha·giparangba, mija bang·gija salrangna skang mangmango Mongmarangchi chadrapa man·aoni jentensa jokaha.
Mongmarangko rike galatchina gita chinga Wildlife Department aro South West Khasi Hills-ni Deputy Commissioner-ko baditaba changa mol·molahachim indiba maming dakchakaniko man·jaha ine Lyngdoh aganaha.
‘‘Mongmarangko rike galatchina gita da·o chinga sorkarina dikdiksa somoiko on·kugen, uno chingni mol·molako chu·sokatjaode, chingna maming chol dongjaha, niamko chinga chingni jako ra·aignok, daitko sorkari ra·na nanggen,’’ Ryja aganaha.
Indake Sorkari, mongmarangko rike galatjaode mongmarangko goe galtokna gita uamangni tom·anio tik ka·aha.