VPP-ni dilgiparangko gronge agangrikna ku·rachakani ja·man asonge jingjengataniko dontongata

SHILLONG: Sombar salo, a·dokni Law Minister Ampareen Lyngdoh, Secretariat sambao jingjengatenggipa Voice of the People’s Party (VPP)-ni dilgiparangko okamatenba, uamangko salsa salgnini gisepon a·dokni Chief Minister Conrad K Sangma grongenba, uamangni dabienggipani bidingo agangrikna sienga ine ku·rachakaniko on·atahani gimin VPP-ni dilgiparang, Secretariat sambao asonge jingjengataniko Sombar salo dontongatchengaha.
Ra·gala man·gipa Lokayukta-ni official-rangko kamo ra·pilchina dabie, re·anggipa Sukrobar salonin VPP-ni dilgiparang, Secretariat sambao asonge jingjengataniko dakengachim ine nikna man·a.
Indake ong·genchimoba, uamangni dabienggipani bidingo a·dokni chief minister, VPP-ni dilgiparangko gronge agangrikna ku·rachakahani gimin Sombar salo asonge jingjengataniko dontongatchengaha.
“Chief Minister aro sorkari official-rang, VPP baksa tom·e agangrikna siengani gimin chinga chingni jingjengataniko dontongchengna nangnikaha,” ine Law Minister-ko grongeani ja·man, VPP-ni president aro Nongkrem MLA Ardent Miller Basaiawmoit aganaha.
Basaiawmoit-ni aganani gitade, uamangni ramao jingjengataniara so·sojengjeng ong·atna miksonge jingjengatenga ong·jachim indiba Lokayukta-ni official sakgittamko maming a·sel gri kamoniko ra·galahani giminsa sorkarini kamo suk ong·gijaniko mesokna aro ia official-rangko kamo ra·pilchina dabie jingjengatengachim.
“Uni gimin chinga ia pilakni giminan Law Minister baksa agangrikaha aro Lokayukta-ni official-rangko ra·galaniara niamni a·palo ong·enga ine chief minister-na u·iatskachina chinga aganaha,” ine Basaiawmoit janapatenba, ia official-rangko ra·galani bidingo namgipa a·selrangko mesoke on·na man·ja ong·ode aro uamangko kamo ra·pilna jechakgenchimode uamangni asonge jingjengataniko a·bachengatpilgen ine mikrakataniko on·angaha.
Tangka paisa jakkalsretanio jak donggipa chief minister-ni mandeko sandirokengani giminsa Lokayukta-ni official salgittamko ra·galaha ine sorkariko matnangatengon, ia official-rangko iandake ra·galaniara chanchichipna kragipa ong·ani giminsa da·alo uamang sorkarini kosako jingjengatna draatako man·enga ine VPP-ni president parakataha.
Meghalaya Lokayukta Act-ko mangrakbatatna nangengani gimin aganangengon, Lokayukta-ni kamrango jak on·pajachina VPP, sorkarini dilgiparangko mikrakataha.
Sukrobar salo, VPP-ni MLA saksako police-rang kragija dake jak dangtapaha ineba Basaiawmoit an·tangni suk ong·gijaniko parakataha.
“Assembly-o privilege committee donga aro iani bidingo chingni MLA-rang ja·kuko de·chongmotgen. Chinga police-rangni kosako ja·kuko de·enga ong·ja indiba chingko manderangsa seokahani gimin chinga seoka man·giparang ong·e manderangni pal kamko ka·enga,” ine ua aganaha.