SHILLONG: KHADC aro JHADC-ni term-rangko ra·dodapatna miksonganirang dongengani gimin NPP-chi dilenggipa MDA sorkariko Voice of the People’s Party (VPP) matnangattaiaha.
Iani bidingo kobor ra·timgiparang baksa agangrikengon, “Lokayukta-ni official-rangkode niamrang dongani gimin uamang (sorkari) ra·galaha ine mesokna jotton ka·enga indiba district council-ode term-rangko ra·dona ba election-rangko ja·donggaate dongna maming niamrang dongjani gimin uamang an·tangtangni man·gnina cholko ra·skaenga,” ine Nongkrem MLA aro VPP-ni president Ardent M Basaiawmoit parakataha.
MDA sorkariko ‘gangbo’ dakbatsranggipa sorkari ine matnangatengon, “Ia sorkari baditana kingking gangbo daka aro ka·namja, ukosa chinga manderangna aganna man·aigen,” ine Basaiawmoit aganaha.
KHADC aro JHADC-ni ning·o delimitation dakani ba constituency-rangko sualtaienggipani bidingo janapatengon, “Ian ADC-ni term-rangko ra·dona aro election-ko ru·utatna sorkarini miksonganiko pa·sikna dakanisan ong·aia,” ine VPP-ni president parakataha.
KHADC aro JHADC-ni term-rang re·baenggipa March jani 5 tarikon bon·engahachim ine nikna man·a.
KHADC aro JHADC-ni term-ko minggni miksonganirang dongani giminsa NPP-chi dilenggipa sorkari, ra·dodapna miksongenga aro sorkarini miksonganirangko uamang namen ma·sienga ine adita salrangna skangsan VPP-ni ku·wattimgipa Batshkem Myrboh-ba parakatahachim.
“Skanggipa a·selde NPP-chi dilenggipa MDA 2.0 sorkari, a·doko tangka paisani gita neng·nikanirangko ra·baahani giminsa ia district council damgnini term-ko ra·dodapatna miksongenga. District council damgnini election-ko ong·atna gita sorkario tangka paisarang dongjaha gita nikenga. Gnigipade a·dok sorkari, da·o district council election-o an·tangtangni candidate-rang ama cha·gen ine ma·sisoengani giminsa uamangna seat-tango asongna cholko on·na nangnikkuenga,” ine VPP-ni dilgipa aganahachim.
NPP aro NPP baksa bakrimenggipa dolrang ba da·o ong·enggipa MDC-rang, district council-ona re·bapilaniara namen neng·beani ong·gnok ineba ua aganahachim.
“An·tangtangni membor-rang, da·o man·enggipa bil aro cholrangko ra·e dongkuchina gitasa NPP-chi dilenggipa MDA sorkari, KHADC aro JHADC-ni term-ko ra·dodapna jotton ka·enga,” ine Myrboh aganahachim.