SHILLONG: Mongolbar salo, United Democratic Party (UDP) aro Hill State People’s Democratic Party (HSPDP)-ni nangrime bikotgipa Regional Democratic Alliance (RDA)-ni tom·aniko Shillong songjinmao donggipa UDP office-o ong·atangaha aro ia tom·anio Shillong Parliamentary constituency-o RDA-ni candidate ong·e susaenggipa Robertjune Kharjahrin-ni Lok Sabha election-na campaign ka·anikoba a·bachengatjolaha.
Ia tom·anio UDP aro HSPDP dolrangni common candidate Robertjune Kharjahrin-koba dolgnini MLA-rang, MDC-rang aro gipin dilgiparangna talate on·angjolaha.
Ia tom·anio RDA-ni candidate Robertjune Kharjahrin, UDP aro HSPDP-ni membor-rangna aganprakengon, Meghalaya a·doko ILP-ko ra·gatchina dabiani, Khasi ku·sikko Eighth Schedule-o chapatchina dabiani, Bangladesh a·songo songdongenggipa Khasirangko dokkol ka·ani, Assam aro Meghalaya a·dokni simao ru·utbea bilsirangna meligrikna man·gijani aro uandakgipa dingtang dingtang kamrangan uni campaign ka·anio mongsonggiparang ong·gen ine parakataha.
Meghalaya a·dokna Indian Civil Services-ni dingtang cadre-ko nangengani giminba ua ku·rang on·anggen ineba Kharjahrin aganaha.
Meghalaya a·doko UDP aro HSPDP dolrangan mongsongbatgipa regional party-rang ong·engani gimin ia chang election-oba VPP, uamangna maming nangchakeaniko ra·bajawa ineba RDA-ni candidate parakataha.
Ia Lok Sabha election-o RDA, Congress aro NPP gita bilakgipa dolrang baksa susagrikengoba, Shillong-o Congress-ni seat-ko ra·sekna gita RDA-o bakrimenggipa UDP aro HSPDP dolgnini dilgiparangan ka·dongskaengachim.
