TURA: North Eastern Hill University (NEHU) Tura Campus-ni ning·o donggipa Garo Department-ni Alumni Meet-ko Mongolbar salo, NEHU Tura Campus-o ong·atangaha aro ia tom·anio NEHU Tura Campus-ni gitcham Pro-Vice Chancellor Prof Milton S Sangma, mongsonggipa sokgipa ong·e bak ra·angaha.
Tom·ani a·bachengao, Garo Department-ni Head Dr Jacqueline R Marak, rimchaksoani kattarangko aganangengon, 1996 bilsioni 2023 bilsiona NEHU Tura Campus-ni Garo Department-o poraianggipa gitcham chatro chatrirangko ia tom·anio niksona mann·e an·tangni kusi ong·aniko parakangaha aro uamang pilak kamtangtangko name ka·tokengani gimin mittelpilangaha.
Ia tom·anio, NEHU Tura Campus-ni gitcham Pro-Vice Chancellor Prof Milton S Sangma, jinmana aganprakangengon, NEHU Tura Campus-ni Garo Department-o poraianggipa chatro chatrirang da·o dingtang dingtang university, college, skul aro office-rango songsalni namroro silroroanina kamrangko ka·enga ine mittelpilaniko parakangaha.
Mikkangchi Alumni Association-ni kam ka·anio, NEHU Tura Campus aro pilak University-na tom·tomani aro namroro silroroaniko ra·bana gitaba ua ku·pattiangaha.
Ia tom·anio, dingtangmancha Prof Caroline R Marak-ni segimin ‘Longinus Sublime-ni Gimin’ aro Alumni-ni sechimonggipa ki·tap ‘Sechokchim’-koba Prof Sangma-ni jakchi oprake on·angjolaha.
Ia tom·anio, Garo Department-ni gitcham Head, Prof Caroline R Marak-ba jinmana aganprakangengon, kamtangtango chubate aro bimchipbate dangdike on·angchina gita university-ni gitcham chatro chatrirangko didiangaha.
Ia tom·aniona Garo Department-ni gitcham chatro chatrirang, sak 70-na batpile re·bae bakko ra·angtokaha aro an·tangtangni skigiparangna mittelpilaniko parakangtokaha.
Mikkangchi Alumni Association-ni gita dakna nanggni kamrangni giminba ia tom·anio chanchirimangaha.