SHILLONG: Meghalaya a·doko drugs ba pekatgipa samrangko jakkalanirang batroroengani a·selan a·dokni songsal ong·siatako man·enga ine Khasi Hills Autonomous District Council (KHADC)-ni Chief Executive Membor (CEM) Pyniaid Sing Syiem, an·tangni suk ong·gijaniko parakatenba, drugs jakkalaniko bon·atsrangchina gita a·doko songdongengenggipa manderangko didiangaha.
Sonibar salo, Umiam Youth Week-ni bon·kamgipa salo bakko ra·e, jinmana aganprakengon, “A·doko bang·a chadamberangan pekatgipa samrangko jakkale da·o ong·katpilna man·gija dongtokenga aro ian an·chingna namen dukni katta ong·enga. Chadamberangni pekatgipa samrangko jakkalanian ia songsalni dal·batsranggipa neng·nikaniba ong·enga,” ine Syiem aganaha.
Syiem-ni aganani gitade, pekatgipa samrangko jakkalaniara sajinma gitan apsan ong·aia maina ian a·dokni song ge·anti aro gittim antion neng·nikanirangko ra·baenga.
“Ja·manchakdugana skangan an·ching da·o chakate kamko ka·ani somoi ong·engaha,” ineba ua aganaha.
Nokdango mande saksa pekatgipa samrangko jakkalahaon, nokdang gimiksa neng·nikanirangko man·na nanga aro iako ua an·tangan mikrontangchi nikmanaha ineba KHADC CEM aganaha.
A·dokko pekatgipa samrangoni jakgitel ong·atna gita jatko dilenggipa manderang aro a·doko songdongenggipa manderangni gisepo nangrime kamrangko ka·china gitaba ua didiangaha.
Meghalaya a·doko songdongenggipa manderangoni 7 percent-na baten pekatgipa samrangko jakkale saanirangko man·enggipa manderangsa ong·achim ine nikna man·a.
Official-rangni see rakkianiko parakani gitade, Meghalaya a·doko songdongenggipa lak 35 manderangni lak 2.5-de drug addict ba pekatgipa samrangko jakkalanio ranta ong·gimin manderangsa ong·achim.
Ia lak 2.5 manderangoni, sak 30,000-de me·chikrang ong·a ineba official-rangni see rakkianio parakaha.