SHILLONG: Lok Sabha election dongani giminsa ia bilsio Meghalaya Legislative Assembly-ni Budget Session-ko February jani gisepon ong·atna nangenga ine Budbar salo, a·dokni Chief Minister Conrad K Sangma talataniko on·angaha.
Iani bidingo talbatataniko on·angengon, Lok Sabha election sepangengahani gimin a·dokni chu·gimik budget-ko pass ka·na man·jawa ine nikesa Budget Session-ko seng·gnangan ong·atna nangenga ine Chief Minister parakataha.
“Election-ni tarikrangko parakatahaode chinga vote-on account-ko ra·na nangaignok aro unode chu·gimik korosrangko mesokna man·jawaha. Uni giminsa chinga vote-on account-ko ra·na nanggija bilsi gimikna Budget-ko pass ka·na man·na gita seng·gnangan Budget Session-ko ong·atenga. Iako dakanichi mikkang bilsinaba maming nangchakeani dongjawa,” ine Sangma aganaha.
Ia changde Meghalaya Legislative Assembly-ni budget session-ko February 16 tarikonin a·bachengatna tik ka·ahachim.
Batanggimin bilsirangode Meghalaya Assembly-ni budget session-ko March jaosa ong·atrongachim indiba ia bilsiode Lok Sabha election dongani gimin budget session-ko seng·gnangkale ong·atskana tik ka·ahachim.
MRSSA-ko ma·mong sorkarini jegalatani bidingo sing·anina aganchakaniko on·angskaengon, iani bidingo a·dok sorkari, dingtang dingtang dolrang baksa chanchirimanggen ine Chief Minister parakataha.
“A·songni aro niam bidiko pangchake nambatgipa niamrangko bikotna chinga cholrangko sandigen,” ine Sangma aganaha.
