SHILLONG: Tura Parliamentary constituency-o National People’s Party (NPP) bilakgenchimoba, una ia Lok Sabha election-o maming ‘jajrengna’ nangani dongja ine Tura Lok Sabha constituency-o Congress dolni candidate ong·e susaenggipa aro Gambegre MLA Saleng A Sangma parakataha.
Tura Lok Sabha seat-ko ru·utbea bilsirangonin Lok Sabha-ni gitcham Speaker PA Sangma sagini nokdang jakkepe dongengachim aro ia changoba uni demechik Agatha K Sangma, NPP-ni candidate ong·e susataiengachim ine nikna man·a.
Iani bidingo sing·anina aganchakaniko on·angengon, “Angni Nokgipao bi·ani aro namgipa rasongan angna ia chang election-o kam ka·gen ine anga ka·dongenga. Darangan darangnaba jajrenganiko on·na amja maina MP-ko seokanide Tura constituency-o songdongenggipa manderangni jakosa ong·a,” ine Saleng aganaha.
Lok Sabha election-na uni tarisamsoanirangko sing·on, manderang ru·uta somoirangonin an·tangtangko tarisamsotokengaha ine Congress MLA aganaha.
“Manderang an·tangtangan mai dakgipa dilgipako nanga an·chingna bate ma·sibata. Anga manderangona re·ange, anga saksa namgipa dilgipa ong·gen ine ku·rachakenba, uamangni vote-rangko bi·ameode angni kaman ong·jawa. Batanggimin somoirango uamangni seokgimin dilgiparang maikai uamangna dangdike on·aha, uamang pilakkon nikmanaha,” ine Tura Lok Sabha constituency-o Congress candidate ong·e susaenggipa Saleng Sangma aganaha.
Tura-ni MP-na seokako man·genchimode uni mongsonggipa kamranga mai ong·gen ine sing·anina aganchakengon, ua pangnan lekka pora, an·seng baljokani aro gama ge·ani kamrangko namdapatna nangengani gimin aganronga ine Saleng parakataha.
“Skigiparangni neng·nikanirangko man·chape iandakgipa kamrangni gimin anga pangnan Assembly-o janapronga,” ine ua aganaha.
Gam-jinni gita nigenchimode ua PA Sangma sagini nokdang baksa tosusaanio maming ong·rikpajawa aro uni nokdangde indita bilsirangna dongsogiminsa ong·aha ine janapatengon, “Manderangni dingtanganiko nangnikgenchimode angna pu·onaba gnang ba uamang angko galnaba man·aia. Angko seokchinade anga uamangko drana man·jawa. Uamang PA Sangma-ni nokdangkon ong·nikbate nika ong·ode ong·aichina indiba uamang angko seoka ong·ode anga uamangko warachakchongmotgen,” ine Gambegre MLA aganaha.
Saleng Sangma-ra saksa MLA ong·ani gimin Tura constituency-o susagrikani ong·na sienga ine adita salrangna skangsan, NPP-ni working president Marcuise Marak aganahachim.
