TURA: South Garo Hills a·jani Rongara jolo songdongenggipa manderangni namgnina State Bank of India (SBI) Rongara branch-ko kulipiltaichina gita BJP South Garo Hills-ni district president Calis Momin, Tura-o donggipa SBI regional office-ni regional manager-na seachi mol·molataha.
Momin-ni parakatani gitade, SBI Rongara branch-ko 2005 bilsio chipa intalan Rongara jolrango songdongenggipa manderang, an·tangtangni tangka paisarangko okna aro bank-ni ma·manti kamrangna Baghmara-onasa chel·bee re·angna nangani a·sel bang·en neng·nikanirangko chagrongna nangtokengachim.
“Rongara-o SBI-ni branch office-ko chipa intalan Rongara-ni manderang komibeoba kilometer 40 aro Nekora jolrango songdongenggipa manderangde km 70-80-mangko songreange Baghmara-ona re·angesa an·tangtangni tangka paisarangko aro bank-ni ma·manti kamrangko ka·na nangtokengani a·sel neng·nikanirangko chagrongna nangtokenga. Rongara aro Nekora jolni manderang, bank-ni kamrangna indita chel·begipa ramako songrena nangengani a·selan an·tangtangni gamchatbegipa somoi aro tangka paisarangko bon·atna nangenga,” ine Momin janapatenba, Rongara jolrango MGNREGS-ni kamko ka·enggipa manderangba tangka paisarangko okanio neng·nikanirangko chagrongna nangtokenga ine parakataha.
SBI Rongara branch-ko chipaoni da·o bilsi 18 ong·pilengahaon, Rongara jolo manderangni jelbra jelsuaniba da·o bataha aro bank-ni kamrangna nanganirangba batroroengaha ineba BJP South Garo Hills-ni district president parakataha.
Rongara jolo bank dongjani a·sel dingtang dingtang sorkari department-rang, jekai C&RD Block, PHE, ICDS aro uandakgipa department-rangba bank gita on·enggipa ma·manti scheme-rangko on·anio neng·nikanirangko chagrongna nangenga ineba Momin parakataha.
