SHILLONG: Ia bilsini Lok Sabha election-o a·song gimikon I.N.D.I.A bloc-o bakrimenggipa dolrang, BJP baksa susana seat-rangko sualgrike susatokengon, Meghalaya a·dokode da·o dipet TMC aro Congress dolgnini gisepo seat-rangko sualgrikanirang dongskakujaenga.
Iani bidingo sing·anina aganchakaniko on·angengon, da·o dipet All India Congress Committee (AICC)-oni maming u·iatanirangko man·soa dongkuja aro AICC-ni ge·etanio pangchakesa TMC baksa seat-rangko sualgrikaigen ine Meghalaya a·doko Opposition dolko dilenggipa aro Congress Legislature Party (CLP)-ni dilgipa Ronnie V Lyngdoh parakataha.
“Da·o dipet chinga Shillong aro Tura parliamentary seat damgninan candidate-rangko tik ka·manaha. Adita salrangna skang, ia seat damgnina candidate-rangko tik ka·na gita Guwahati-o screening committee-ni tom·aniona re·baanioba AICC-ni dilgiparang, TMC baksa seat sualgrikani giminde mamingkoba janapjaha,” ine Lyngdoh aganaha.
Tura Lok Sabha seat-na Gambegre-ni MLA Saleng A Sangma aro Shillong Lok Sabha seat-na da·o ong·enggipa MP Vincent H Pala-kon Congress candidate-na tik ka·manahachim ine nikna man·a.
Ia Lok Sabha election-o Congress dol, darang gipin dolni candidate-rangkoba mikchepe ra·jaenga ineba CLP-ni dilgipa parakataha.
“A·dokni parliamentary seat damgniko cheanian chingni nisan ong·enga aro a·dokni manderang, an·tangtangni naljokanina namgipa dilgiparangko nangnikenga ong·ode gital dake chanchienba dilgipako seokchina chinga manderangna u·iatna miksongenga,” ine Lyngdoh aganaha.
Assembly aro district council election-rangde Lok Sabha election-oni namen dingtanggrika ineba Congress dolni dilgipa parakataha.
Ma·mongo BJP-chi chalaienggipa sorkari, Tribal-rangna on·gimin bilrangko pe·na jotton ka·enga ine matnangatengon, a·songni jakgitelani aro bilrangko pe·na jotton ka·engani a·selan a·songko chalaianirang namen bilgriengaha ine Lyngdoh parakataha.
