DBC-o Faculty Development Program-ko salgnina ong·ata

TURA: Higher Education ba chubata gadangni lekka poraniko on·anio skie on·enggipa manderangni kamrangko namdapatna gita February-ni 1 aro 2 tarikrango, Tura-ni Don Bosco College, dingtangmancha Faculty Development Program-ko salgnina, Tura Walbakgre-o donggipa Pastoral Centre-o ong·atangaha.
Ia program-ko ong·atanio, Bengaluru-ni Krishu Jayanti College-o donggipa Commerce department-ni assistant professor-rang, chong·motan Dr Chandra Kanth aro Dr Raj Kamal, skigiparangna agan-talate on·anirangko dakangaha aro higher education-o skie on·ani bewalrangko agan-skie on·angaha.
Ia salgnina ong·atanggipa program-o dingtang dingtang katta bichongrang, jekai National Education Policy (NEP), Higher Education Institution (HEI)-rango chagrongna nanggipa neng·nikani aro uandakgipa dingtang dingtang kamrangni bidingo jinma apsan chanchirime, skigiparangni jakchi agan-talatanirangko on·angaha.
Ia sal somoirango a·songni pilak biaprangon, NEP 2020-ko ra·gatanichi dingtang dingtang neng·nikanirangko chagrongna nangtokengani gimin ia program-ko ong·ataniara Don Bosco College aro dingtang dingtang college-ni skigiparangna namen namgni ong·aha.
Ia program-ko ong·atanio Tura Don Bosco College-ni Principal-ba aganprakengon, higher education-o skigiparangni gunrangni gimin agan-talatanirangko on·angaha.