SHILLONG: Budget Session-ni skanggipa salo, a·dokni Governor Phagu Chauhan, Hindi ku·sikchi aganpraktaina siengani gimin uni aganprakaniko English ku·sikchi pe·samsona Assembly Secretariat tarimanaha aro ia English-chi pe·gimin copy-ko Session-ni skanggipa salo, membor-rangna sualatgen.
Opposition dolni dilgipa Ronnie V Lyngdoh-ni parakatani gitade, Budget session-ni skanggipa salo, a·dokni Governor Phagu Chauhan, Hindi ku·sik aganprakgen ine Business Advisory Committee (BAC)-ni tom·anion, Assembly-ni Speaker Thomas A Sangma u·iataha.
Governor-ni Hindi ku·sikchi aganprakaniko English ku·sikchi pe·skae, hard copy-ko Assembly-ni table-o dongen aro pilak membor-rangnan sualatgen ineba Assembly Speaker u·iataha ine Lyngdoh aganaha.
Lyngdoh-ni aganani gitade, Assembly-ni budget session-o membor-rang, Garo ba English ku·sikchi aganna sikgenchimode aganna man·aigen aro uamangna Assembly, dingtangmancha translator-ko tarisamsona jotton ka·enga ine Assembly Speaker, BAC-ni tom·anio talataniko on·ataha.
“Membor-rang ku·tangchi aganna man·na gita Assembly, pe·timgipako donna jotton ka·enga aro iani bidingo da·o Assembly Secretariat, nanga kamrangko ka·soengaha indiba iako chu·sokatna nangnikenga,” ine Opposition dolni dilgipa aganaha.
Governor-ni Hindi ku·sikchi aganprakaniko English ku·sikchi pe·timataniara VPP-ni dabianiko chu·sokatani ong·engama ine sing·anina aganchakaniko on·angengon, ian VPP-ni dabianiko chu·sokatenga ong·ja maina VPP-ni iako dabina skangan kamrangko ka·somanahachim ine Lyngdoh parakataha.
Re·baenggipa February-ni 16 tariko, Meghalaya Legislative Assembly-ni budget session-ko a·bachengatanio, a·dokni Governor, Hindi ku·sikchi aganpraktaigenchimode, uni aganprakanio bak ra·jawa ine adita salrangna skangsan, Voice of the People’s Party (VPP)-ni membor-rang parakatahachim ine nikna man·a.
Re·anggipa 2023 bilsini Budget Session-ko a·bachengatani somoioba, a·dokni Governor, Hindi ku·sikchi aganprakahani gimin ian joltangni membor-rangko chonnikani gita ong·aha ine matnangenba, VPP-ni MLA sakbri, session-oni ong·kate katahachim.