GUWAHATI: Assam a·doko songdongenggipa manderangko gisik saate, Assam a·dokni a·a jaksisakoba Meghalaya a·dokna on·na man·jawa ine Assam sorkari parakataha.
Ru·utbea bilsirangna Assam aro Meghalaya a·dokni simarango ong·enggipa golmalrangko namatna gita Assam aro Meghalaya sorkarirang, re·anggipa bilsionin apsan agangrike, ia agangrikani skanggipa bakkode matchotatna man·pilahachim aro uandaken da·o gnigipa agangrikanikoba dakengahachim ine nikna man·a.
“Ia sorkari a·a jaksisakoba Meghalaya on·jawa aro Assam-o songdongenggipa manderangko gisik saatjawa,” ine Assam-ni Border Protection & Development Minister Atul Borah, da·o ong·enggipa Assam Assembly-ni Budget Session-o aganaha.
Borah-ni parakatani gitade, meligrikna man·jaenggipa biaprango songdongenggipa manderangni nangnikani krisa a·dok damgnini gisepo agangrike, songgigrikanirangko dakenga.
Assam a·dokni a·arangko Assam sorkari, Meghalaya a·dokna on·enga ine Assembly-o Independent MLA Akhil Gogoi-ni matnanganirangna Borah, ia kattarangko aganchakaha.
Iani bidingo Assam Assembly-ona chanchirimaniko ra·baengon, 1983 bilsio Independent Commission-ni parakani gitade, a·dok damgnini gisepo meligrikna man·jaenggipa biaprangko Meghalaya a·dok maming a·kanganirang dongjani gimin Assam-ni a·arangko Meghalaya a·dokna on·na nangani katta dongja ine Opposition dolni dilgipa Debabrata Saikai aganchengahachim.
Assam aro Meghalaya a·dokni simarango meligrikna man·jaenggipa gimik dam 12 biaprang donga aro ianoni damdok biaprangkode namatna gita 2022 bilsini March jaon a·dok damgnini dilgiparang, New Delhi-o Union Home Minister Amit Shah-ni mikkango soi ka·grikahachim.
A·dok damgnini gisepo meligrikna man·jaenggipa damdok biapni 36.79 square kilometre-oni 18.46 sq km-ko Assam aro 18.33 sq km-ko Meghalaya a·dok man·skaahachim.