Tura: Garo Students’ Union-ni Chokpot regional unit, South Garo Hills Chokpot Jetra-o Eklavya Model Residential School-ko a·bachengatna jemang-an jak on·paaha uamang sakantikon uamangni mittelpilaniko janapaha.
School kuligipa biapona re·ange nie ST aro song-gadam-nokadam a·jolrango songdongenggipa songni manderangni namgnina India sorkarini Tribal Affairs Ministry-ko uamangni mittelanikoba NGO janapaha.
“Ua a·jolrangni kangal-cholgri bi·sarangna ian dingtangmancha dak-chakani ong·enga. School nokko rikna Jetra A·king Nokma-ko uni A·kingni a·ako on·anina chinga chingni ka·tong gisik gimikchi mittelna namnika. Re·baenga chasongo uni songni bi·sarangni nam-gnina ua an·tangna chanchiaigija namgipa kamko ka·aha,” general secretary Spensar Sangma, aganaha.
Chokpot-ni namroro-silroroanina uni dondikgija kam ka·anina uamang Chief Minister, Conrad Sangma-ko mittelaha.
“Batanggimin bilsi 50-o a·jolo namroro-silroroaniko nikna gita man·engaha aro ia skul ia a·jolna mikkangchi namroro-silroroanina namgni ong·angkugen chinga ka·dongenga,” uamang agandapaha.
