SHILLONG: Meghalaya a·doko niam gri koela badinganirangko champengna man·kujaengani gimin India-ni Supreme Court, Meghalaya High Court aro National Green Tribunal (NGT)-ni dongimin niamrangko bilakbate ja·rikchina gita Meghalaya a·dokni pilak superintendent of police (SP)-rangnan a·dok sorkari mikrakataniko on·ataha.
Meghalaya a·dokni dingtang dingtang koela a·damrango niam gri koela bikotaniko aro salruraaniko champengna man·jagenchimode niamo pangchake rakgipa ja·kurangko de·anggen ineba a·dok sorkari, dingtang dingtang a·jani SP-rangna mikrakataniko on·angaha.
A·dok sorkarioni u·iatani gitade, re·anggipa 2024 bilsini January 18 tarikon, dingtang dingtang a·jani SP-rangna, High Court-chi songe on·gipa single-member committee, show cause notice-rangko on·manahachim.
Ia ge·etanio SP-rangko, ta·raken niam gri koela bikotani aro salruraaniko champengatchina aro an·tangtangni ja·ku de·ani report-ko, Meghalaya a·dokni Director General of Police (DGP)-ni jako, Home department-na on·atchina gita committee u·iataniko on·ahachim.
Meghalaya a·dokni South Garo Hills aro East Khasi Hills a·jarango, niam gri koela bikotanirangko aro salruraanirangko salantian gita dake nikna man·kuenga ine batanggimin somoirango bang·en badi ka·anirangko knasona man·ahachim.
Meghalaya a·doko niam gri koela bikotaniko NGT aro kacharirang champengatahaoba da·onan niam gri koela badinganiko champengna man·skakujaengachim.