SHILLONG: Hynniewtrep National Liberation Council (HNLC) bobil dolni sorkari baksa agangrikaoni an·pilangani ja·man bobil dolko agangrikna okampilenggipade ua ong·ja indiba a·dok aro ma·mong sorkarirangsa ine Mongolbar salo, a·dokni Deputy Chief Minister aro Home Minister Prestone Tynsong talataniko on·angaha.
Deputy Chief Minister Prestone Tynsong-ni uamangko grongna okamaniko uamang ra·chakenga indiba uamangni tik ka·gimin biaposa uamang uko grongegen ine adita salrangna skang, HNLC bobil dolni general aro publicity secretary Sainkupar Nongtraw, social media-o parakatahani gimin Tynsong, ia kattarangko aganskaaha.
“Prestone-sa uamangko (HNLC)-ko agangrikna okamenga ine social media-rango parakaniara kraani ong·ja maina uamangko agangrikna okamenggipade anga ong·ja indiba India sorkari aro a·dok sorkarisa ong·a,” ine Tynsong parakataha.
HNLC bobil dol baksa agangrikna gita ma·mong sorkari, da·oba do·gako oe donengkua ineba ua parakataha.
“Sorkari baksa agangrikaniko dontongkujachina chinga da·oba a·dok sorkari pal HNLC-ni dilgiparangko didienga,” ine ua aganaha.
Sorkarini agangrikna mol·molaniko ‘dakmikgipasa’ ine HNLC bobil dolni social media-o matnangatgipana aganchakaniko on·angengon, “Skango angni agangimin gitan chinga HNLC-ni dilgiparangna naljoke re·ruraanirangko ku·rachakenga. HNLC-ni chairman aro commander-in-chief-ko man·chape chubata gadangni dilgiparang rim·a man·na kenesa sorkari baksa agangrikna re·bajaengakon indiba uamang kenna gita nangjawa,” ine Deputy Chief Minister parakataha.
“Na·simang (HNLC) Meghalaya a·dokni a·palo agangrikna nangnikgenchimoba chinga uko dakna kusi ong·aigen aro biapko na·simangan tik ka·na man·aigen,” ine ua aganaha.
Da·o dipet sorkari baksa agangriktaiani bidingo HNLC bobil dolni aganchakaniko man·soa dongkuja ine janapatengon, “Iani bidingo ango mamingkoba agandapani dongjawaha indiba uamangna do·gako oe donengkua,” ine Tynsong parakataha.