SHILLONG: Meghalaya Legislative Assembly-ni Rules of Procedure aro Conduct of Business-o bilrangko on·manahani gimin Meghalaya Legislative Assembly-ni pilak membor-rangkon Khasi aro Garo ku·sikrangchi aganna gita didichina Hynniewtrep Achik National Movement (HANM), Meghalaya Assembly-ni Speaker Thomas A Sangma-ko mol·molangaha.
Iani bidingo HANM-ni membor-rang Budbar salo, Assembly-ni Speaker-ko uni office chamber-o grongenba, memorandum-ko on·angjolaha.
Assembly-ni Speaker-ko grongeani ja·man kobor ra·timgipa manderang baksa agangrikengon, Assembly-o Khasi aro Garo ku·sikrangchi MLA-rangko aganna on·genchimode ia ku·sikrangko Constitution-ni Eighth Schedule-o chapatchina dabianiko mangrakbatatgen ine HANM-ni president Lamphrang Kharbani parakataha.
Khasi aro Garo ku·sikrangko Indian Constitution-ni Eighth Schedule-o chapatchina India sorkariko didina gita Meghalaya Legislative Assembly, 2018 bilsini September 27 tarikon resolution-ko pass ka·ahachim ineba HANM-ni president, gisik ra·atpilaniko on·angaha.
Kharbani-ni parakatani gitade, Meghalaya Legislative Assembly-ni resolution-na chakpaaniko on·na gita HANM-ni membor-rang, re·anggipa bilsini November jao, New Delhi-ni Jantar Mantar-o asonge jingjengatanikoba dakangahachim.
Sukrobar saloni a·bachengatna sienggipa Budget Session-o Governor-ni aganprakaniko English-chi pe·timna gita dingtangmancha kolko jakkalna tik ka·ahani giminba HANM, Meghalaya Assembly-ni Speaker-ko mittelpilangaha.