WILLIAMNAGAR: East Garo Hills a·jani Songsak reserve forest-oniko niam gri bol badingenga ine A·chik Organisation for Social Welfare (AOSW) parakatenba, ia forest reserve-oniko niam gri bol badinganiko nikengoba champengna gisik nangjaenga ine a·dokni Forest department-ko matnangataha.
AOSW-ni dilgipa Premier Sangma-ni u·iatani gitade, niam gri bol badingenggipa manderang, Songsak reserve forest-oniko chainsaw-rangchi bolrangko rate ra·enga ine badi ka·anirangko man·soani ja·man, uamang ia reserve-ona re·ange nion, ia reserve-o niam gri bolrangko rate ra·engani a·sel buringni porongrong ong·anganikosa nikeaha.
Forest department-ni nirokenggipa reserve forest-rangoni ia Songsak reserve-an buring bolgrim dikbatsranggipa reserve ong·achim ine nikna man·a.
“Chingni Songsak reserve-ona re·ange nion, uano niam gri bol badingenggipa manderangni chainsaw-rangchi bol rataniko nikeaha aro uamang chingko nikon, ua biaponi kataha,” ine AOSW-ni president parakataha.
Ia reserve-o donggipa bolsal, segun aro pilak rokomni bolrangkon niam gri badingenggipa manderang, chainsaw-rangchi supee, ia biaponiko ra·angenga ineba Sangma parakataha.
Ia buringoniko niam gri bol rate ra·angengako champengjaengani gimin Forest department-ko matnangatengon, buring bolgrimrangko ripingna gitan Forest department-ko donahaoba iandake kamrangko ka·jaode sawa niam gri bol badingenggipa manderangko champenggen ine AOSW sing·doataha.
“Niam gri bol badinganiko champengchina donenggipa check gate-ranga mai dakenga? Ia manderang maming kamko ka·gija lakni lak tangkarangko dormaha dake cha·e dongaigenma? Niam gri kam ka·anirangko champengna donenggipa police-rangara mai dakenga? Maini gimin iandake Garo Hills-ni bol wa·arangko niam gri badingengoba champengna man·tokjaenga?” ine Sangma sing·doataha.