TURA: Meghalaya Pay Commission-ni recommendation-o pangchake gital Pension Scheme-ko a·dok sorkarini a·bachengatanio, 2010 bilsini April 1 tarik ba uni ja·man a·dok sorkarini kamo rimnapako man·pagipa manderangde General Provident Fund (GPF) aro Death Cum Retirement Gratuity (DCRG) gita dakgipa man·gnirangko man·pajaengahani gimin kamoni neng·takangenggipa pensioner-rang pilakan ia pilak man·gnirangkon man·pachina ine gitcham Pension System-kon ja·riktaipilchina gita All Meghalaya District Ministerial Officers Association (AMDMOA) Garo Hills Region (GHR), Meghalaya a·dokni Chief Minister Conrad K Sangma-na sedoataha.
AMDMOA-GHR-ni parakatani gitade, gital Pension Scheme-ni ning·o Tier-I aro Tier-II donga aro Tier-I-ni ning·ode sorkario kam ka·giparang, an·tangtangni basic pay baksana Dearness Allowance (DA)-ni 10 percent-ko chapna nange, jaantian iako sorkari, uamangni dormahaoniko kattiengachim.
“Gital Pension Scheme-ni ning·o kamoni neng·takani bilsi sokahaon, chu·gimik amount-oni 60 percent-kosan sorkari on·enga aro 40%-kode Life Insurance-na invest ka·na nangenga,” ine AMDMOA-GHR-ni dilgiparang parakataha.
2010 bilsini April 1 tarik ba uni ja·man sorkarini kamrangko man·pagiparangnade DCRG dongjawa ine dongimin niamrang dongani gimin Leave Salary-mangmangkosan man·paaignok ine janapatskaengon, kamoni neng·takangenggipa pilak pensioner-rangan GPF, DCRG aro pilak man·gnirangko man·pachina gita gitcham Pension System-kon jakkalpilna nanga ine AMDMOA-GHR, a·dokni Chief Minister-ko didiataha.
2010 bilsini November 24 tarik dipet Compassionate Ground-o kam on·ani scheme-ko sorkari ra·galatahani a·sel, sorkario kam ka·paenggipa manderang siangna nangahaode ua nokdangni manderang neng·nikanirangko chagrongna nangtokengaha ine janapatskaengon, Grade-III aro Grade-IV-ni ning·o kam ka·enggipa manderangni namgnina Compassionate Ground-o kam on·ani scheme-koba ra·pilchina gita AMDMOA-GHR, a·dok sorkariko didiataha.