SHILLONG: Maweit-o donggipa Coal India Limited (CIL)-ni depot-o chimonggimin koelarangko hisapana baten dakkie galaniko mesokanio koelarang bataha ine dingtang dingtang songbadrango parakatani ja·man, iani bidingo ta·raken ja·kurangko de·china gita Sombar salo a·dokni Opposition Trinamool Congress (TMC) dol, a·dok sorkarina mikrakataniko on·angaha.
“Iani bidingo sorkari ja·kuko de·gen ine chinga ka·dongenga maina MMDR Act 1957-ni Section 21-ko pe·aniara sastiko man·na kragipa niam ong·a aro iandakgipa niamrangko pe·anio official-rang ja·kuko de·na nangchongmota. Ian POCSO gita dakgipa niamsa ong·ani gimin sastiko man·na nanggipa niam ong·a aro iana sorkari, saniba FIR ka·aniko senge dongna nangja,” ine TMC Parliamentary Party-ni dilgipa Mukul Sangma aganaha.
Iandake kobor on·ani bidingo ta·raken ja·kuko de·china sorkariko didiatengon, “Iani bidingo sorkari maming ja·kurangko de·jagenchimode bilo ong·enggipa manderangni kosako chanchichipna draatako man·gen. Bilo ong·enggipa manderang ine aganengon, ian dingtang dingtang gadangni manderang ong·na ama,” ine Sangma parakataha.
Maweit-ni CIL depot-o chimonggimin koelarangna bate dakkie galanian bataha ine songbadrango parakahani gimin songbad segiparangko mittelpilangengon, ian investigating journalism-ni namen nangchongmotgipa gun ong·a aro Meghalaya a·doko media-ni manderang, mikrakbee kamrangko ka·engani gimin media-o ka·donganiko mesokna nanga ine TMC-ni dilgipa parakataha.
West Khasi Hills a·jani Maweit songo donggipa Coal India Limited (CIL) depot-o koelarangko chimongani aro koelarangko dakkiani namen dingtanggrikani gimin ia jolrango songdongenggipa manderang, ia biapo chimonggipa koelarangko dakkiani bidingo sing·doattokaha ine salsa skangmangmangsan songbadrango parakatahachim.
Ia depot-o koelarang metric ton 2000-mangni gitasan dongaiachim indide maikai a·dok sorkarini koela dakkianiara MT 34,000-mang ong·angpilskaaha ineba songbadrango, koela hisapgipa magistrate aro DMR inspector-ni kamko sing·doatahachim.
