SHILLONG: Meghalaya a·doko mongsongbatgipa chiringrangoni Ganol aro Umiew chiringni chibisikrangko chel·chakna gita a·dok sorkari, gong kror 344 tangkarangko chamatmanaha ine Sombar salo, a·dokni Chief Minister Conrad K Sangma, Assembly-o parakataha.
Chief Minister-ni parakatani gitade, ia mongsonggipa chiring dilgnini chibisikrangko chel·chakna gita sorkari, gong kror 344 tangkarangko chamatmanaha aro ia project-ko re·anggipa antion sorkari a·bachengataha.
“Ia project-ko a·bachengatanichi Ganol aro Umiew chibisikrangko chel·chakanio dal·bea ja·ku de·ani ong·gnok,” ine Chief Minister aganaha.
Meghalaya a·doko ra·gatenggipa State Water Policy-ni bidingo janapatskaengon, ia Water Policy-ko ra·gatchenggiparangoni Meghalaya a·dokba damsa ong·enga aro iani ning·o chirangko ripinge rakkina gita sorkari, dingtang dingtang project-rangko a·bachengataha ine Sangma aganaha.
“North Eastern Space Application Centre (NESAC) baksa nangrime kamko ka·gipa a·dokrangoni Meghalaya a·dokba damsa ong·a aro Meghalaya sorkari dam 50,000 chimikrangko mapping ka·manaha,” ineba ua aganaha.
A·dokni dingtang dingtang biaprango chirangko ripingna gita sorkarini manchisoenggipa kamrangni gimin janapatengon, a·ran karirango china diljana gita sorkari, dam 400-oni dam 500-na baten pokkrirangko tarina kam ka·engaha indiba a·gilsakni ding·a batroroengani a·selan chirangko ripingna kam ka·anio neng·nikanirangko chagrongna nangenga ine Chief Minister parakataha.
Iana skang, Umiew chiringona jokbaenggipa chimikrangko ripingchina gita sorkariko didiatengon, Umiew chibisik samba jolrango a·ba o·e cha·engani a·selan chimikrangko chel·chakna man·jaenga ine Opposition dolni dilgipa Ronnie V Lyngdoh parakataha.
Apsan daken, Mawsynram-ni UDP MLA Olan Sing Suin-ba, songantion chiring chibisikrangko chel·chakna nangengani gimin sorkarina ku·pattianirangko on·angaha.
Assembly Session-ni Question Hour-o sing·anirangna aganchakaniko on·angskaengon, Jal Jeevan Mission-ni ning·o dingtang dingtang cholrangchi, ia scheme-ni namgniko man·enggipa nokdangrangna chirangko on·enga ine a·dokni PHE Minister Marcuise N Marak parakataha.
JJM-ni kamko matchotna gita dongimin somoirang dongjagenchimoba a·dok sorkari, JJM-ni kamko 2024 March jani gisepon matchotna gita nisan donenga ineba Marak parakataha.
