TURA: Garo Hills Autonomous District Council (GHADC)-o kam ka·enggipa manderangni man·gni dormaharang da·o ja 32 gappilengahaoba da·alona kingkingan uamangni dormaharangko on·ani bidingo maming ku·rachakanirangko on·jaengani gimin re·baenggipa February 25 tarikni gisepon, dormaharangko on·jagenchimode, bilakbate jingjengatanirangko dakna tik ka·angaha.
Non-Gazetted Employees Association-ni president Brithen Sangma-ni u·iatani gitade, re·anggipa 2023 bilsini September 18 tarikon, GHADC-ni chief executive membor (CEM), GHADC-o kam ka·enggiparangna dormaharangko on·na ku·rachakahachim indiba da·alona kingkingan GHADC-o kam ka·enggipa manderangna uamangni man·na nangkuenggipa dormaharangko matchote on·kujaengani a·sel uamang, nokdangtangtangko chalaianio neng·nikanirangko chagrongna nangtokengahachim.
Iani bidingo GHADC-ni Executive Committee-na seachi u·iatengon, kam ka·enggipa manderangna dormaharangko on·na gita February 19 tarikoni a·bachenge uamang salsni somoiko on·enga aro ia salsnini gisepo dormaharangko on·jagenchimode, bilakbate jingjengatanirangko a·bachengatgnok ine NGEA-ni dilgiparang parakataha.
“Indita jani dormaharangko man·kujaengani a·sel chinga da·o bi·sarangni skul admission, lekka ki·tap, skul uniform aro uandakgipa gipin nangchongmota korosrang baksana nokdang sagipa ding·giparang donggenchimoba sanna bananirangko ra·na man·patokjaenga. Uni gimin chinga salsni somoiko Executive Committee-na on·kuenga indiba February 25 tarikni gisepo chingna dormaharangko on·na man·jaha ong·ode chinga jingjengatanirangko dakana agre maming gipin chol dongjawaha,” ine NGEA-ni president parakataha.
A·dok sorkario kam ka·enggiparang gitan GHADC-o kam ka·enggiparangnaba 5th Pay Commission-ni recommendation-o pangchake dormaharangko on·china gitaba NGEA dabiangtaiaha.
