SHILLONG: Garo aro Khasi ku·sikrangko Constitution-ni Eighth Schedule-o chapatchina gita a·dok sorkari, changchetmangnade ma·mong sorkarina sedoatmanaha ine Sombar salo, a·dokni Chief Minister Conrad K Sangma parakataha.
Assembly-ni Budget Session-o Mawryngkneng-ni Voice of the People’s Party (VPP) MLA Heavingstone Kharpran-ni sing·anina aganchakaniko on·angengon, Garo aro Khasi ku·sikrangko Indian Constitution-ni Eighth Schedule-o napatna gita a·dok sorkari rakbee kamrangko ka·engkua aro iani bidingo ma·mong sorkari baksa agangrikengkua ine Chief Minister parakataha.
Chief Minister-ni parakatani gitade, Garo aro Khasi ku·sikrangko Constitution-ni Eighth Schedule-o napatna nangnikanirang dongani giminsa 2018 bilsion resolution-koba Assembly-o pass ka·dilahachim.
“Garo aro Khasi ku·sikrangko Eighth Schedule-o chapatchina didie a·dok sorkari, changchetmangnade India sorkarina seatahachim. India sorkarini aganchakaniko on·ani gitade, Indian Constitution-ni Eighth Schedule-o napatna gita dingtangmancha dongimin niamrang dongjachim,” ine Sangma aganaha.
Indake ong·genchimoba, Garo aro Khasi ku·sikrangko Eighth Schedule-o chapatna gita somoi ra·chae dongenggipani giminde India sorkarioni maming talatanirang dongkujaenga ine Chief Minister parakatskaaha.
Garo aro Khasi ku·sikrangko Eighth Schedule-o chapatchina dabina gita MDA-I sorkarisa resolution-ko ra·dilchenggipa ong·a ine janapatengon, “Ian chingni sorkariko jako ra·chengmiting somoion ong·a aro ian chingni Garo aro Khasi ku·sikrangko Eighth Schedule-o napatna kingkot kam ka·aniko mesokaniba ong·a. Chinga iani bidingo India sorkari aro Union Home Minister Amit Shah baksa agangrikengkua,” ine Chief Minister aganaha.
Meghalaya Assembly-ni gita iani bidingo gisik nange ku·rang on·angkuode ia ku·sik minggniko Eighth Schedule-o napatna gita Home Affairs Ministry draatako man·gen ineba ua aganaha.
Garo aro Khasi ku·sik minggnikon Eighth Schedule-o napatchina gita apsan somoion ma·mong sorkariko didiatahani a·selsa Home Affairs Ministry, somoi ra·na nangkuengama ine Mawhati-ni Congress MLA Charles Marngar-ni sing·anina aganchakaniko on·angskaengon, Eighth Schedule-o napatna gita MHA-o bangki dongenggipa ming 38 ku·sikrangoni Garo aro Khasi ku·sikrangba bak ong·paenga ine Chief Minister parakataha.
