SHILLONG: Meghalaya a·dokni Reservation Policy-o da·o ja·rikenggipa Khasi-Jaintia-rangna 40% aro Garorangna 40% dake biapko kangani pal, Khasi-Jaintia aro Garorangko man·gope gimikna 80 percent kanganian nambatgipa ong·gen ine Assembly Session-ni gnigipa salo, Mawkyrwat MLA Renikton Tongkhar parakataha.
2019 bilsi dipetan Meghalaya Reservation Policy-ni roster system-ko ja·rikanio jajaanirang donge District Selection Committee aro uandakgipa kamo ra·ani gadangrang bon·chongdika gita ong·engahachim ine nikna man·a.
DSC-ni gita kamrangko ka·anio somoirangko ra·dugaengani gimin janapatskaengon, porikkarangko ong·atanio aro result-rangko parakanio agre ja·manchakengani a·sel chadamberangni kamgri ong·e donganio neng·nikanirang batroroa gita ong·enga ine Tongkhar parakataha.
Reservation Policy-o da·o ja·rikenggipa Khasi-Jaintia-rangna 40% aro Garorangna 40% kangani pal, Khasi-Jaintia aro Garo jat gimiknan 80 percent-ko kanggopchina sorkariko ku·pattiangengon, mande jelbra jelsuaniko niatgenchimode ia niamko ja·rikanian nambatgipa ong·enga ine Mawkyrwat MLA aganaha.
“Khasi-Jaintia aro Garo jat gimikna 80 percent-ko kanggopgenchimode, badiaba kamna Khasi aro Jaintia candidate-rangoni dorgasto galgiparang dongjaode Garorangan 80 percent-ko man·gopgen aro apsan daken badiaba kamna Garo candidate-rangoni dongskajaode Khasi-Jaintiarang 80 percent-kon man·gopskaaigen,” ine Tongkhar aganaha.
Ia chanchirimanio Nongpoh-ni MLA Mayralborn Syiem-ba bak ra·angpaengon, jatgittamna kangenggipa 80 percent-ko ja·rikanio, recruitment process-ni ja·man candidate-rangna chol on·chengani dake ra·skajachina ku·pattianiko on·angaha.
Ri Bhoi a·jao kam bangbang ong·e dongenggipa department-rangko, a·jao songdongkamgipa candidate-rangni dorgastorangkosan ra·chakchina gitaba Syiem aganaha.
“Dorgasto galenggipa candidate, porikka pass ka·gimin ong·osa mikkang nichengani gadangona sokbana man·gen indiba uamang pass ka·kuja ong·ode uan kraani ong·jaenga,” ine Syiem aganaha.
Personal interview-rangko ra·anio maming dongnue dakanirang dongjana gita pangnan CCTV camera-rangko donchina gitaba Nongpoh MLA ku·pattiangaha.